افغانستان

جنرال رازق؛ چې کورنیو ته يې یوازې د اولادونو کوپړۍ هم لېږلې

نن ټکی اسیا (جمعه، ۲۷تلې، ۱۳۹۷ل): جنرال عبدالرازق اڅکزی په ۱۳۵۸لمریز کال د کندهار په سپين بولدک کې وزېږيد، زده کړې يې د یادولو وړ نه دي، په کوچنیتوب کې تر ډېورنډ فرضي کرښې هغې خواته واوښت او موټر مینځلو کې يې کار کاوه.

رازق د امریکا له یرغل سره یو ځای کندهار ته راغی او سپین بولدک کې د یوې پوستې قومندان وټاکل شو، په ۲۰۰۴ز کال یاده ولسوالي کې د سرحدي ځواکونو قومندان شو.

په ۲۰۰۶ز کال اسدالله خالد په کندهار کې والي شو، له دې سره د جنرال رازق نوم هم جوخت یاد شو او بشپړه سرحدي لوا ور وسپارل شوه.

جنرال رازق هغه وخت پر ټول کندهار تسلط پیدا کړ، چې د کندهار پخوانی امنیه قومندان خان محمد مجاهد ووژل شو او په ۲۰۱۱ز کال دی د هغه پر ځای وګمارل شو.

کندهار؛ د بې نمونې وحشت شاهد

د امنیه قومندانۍ چوکۍ په کندهار کې د ولایت تر چوکۍ هم لوړه شوه او کندهاری ولس په تېره بیا د کندهار ښار اوسېدونکي د یوې کوچنۍ دیکتاتوري امپراطورۍ شاهدان شول.

رازق په ټولو مهمو پوځي او امنیتي برخو کې خپل نږدې کسان وګمارل، شخصي زندانونه يې خلاص کړل او د قاچاق، اختطاف او ترور تر څنګ يې ظاهراً د پاکستان په اړه هم مکرجنه ژبه کاروله.

د بشري حقونو د څار کمیسیون؛ خوله چوله کړه!

په افغانستان کې امریکايي عسکرو د خپل ملاتړ لپاره ګڼ جنایت کار وروزل، تمویل يې کړل او د کار اخیستنې لپاره يې نږدې د هر څه کولو واک او اجازه ورکړه.

د بشري حقونو د څار کمیسیون د ۲۰۱۵ز په مارچ میاشت کې راپور خپور کړ، چې د وخت لاندې لوړپوړي چارواکي يې بشري جنایتکاران معرفي کړل:

۱- عطامحمد نور – بلخ کې د وخت والي؛

۲- عبدالحکیم شجاعي – روزګان کې د وخت اربکی قومندان؛

۳- خیرمحمد تیمور – د تخار پخوانی امنیه قومندان؛

۴- حاجي نجیب الله – تخار کې د وخت د ملي امنیت رییس؛

۵- اسدالله خالد – د ملي امنیت پخوانی رییس؛

۶- عزیز الله – د پکتیکا اربکیانو قومندان؛ چې طالبانو کابل کې وواژه.

۷ـ جنرال عبدالرازق – د کندهار امنیه قومندان؛ چې پرون ووژل شو.

د بشري حقونو د څار ادارې دغه راپور د ۱۲۵ مرکو پر اساس لیکل شوی و، چې په ۲۰۱۲ز کال کې د قربانیانو له کورنیو، عیني شاهدانو، دولتي چارواکو، قومي مشرانو، ژورنالیستان، مدني فعالانو، ملګرو ملتونو چارواکو او له افغان او نړیوالو ځواکونو سره شوې وې.

ګارډین د بشري حقونو د څار کمیسیون په حواله د جنرال رازق په اړه لیکي: «تر ټولو بد او وحشي صفته انسان د کندهار د پوليسو مشر جنرال رازق او اووه نور مهم قوماندانان دي.»

جنرال رازق د ولایت مشهور سوداګر په یو بل نوم لوټل خو د نورو ځورونو او تښتونو لپاره يې یوازينۍ پلمه د طالب ملاتړ دعوه وه، ګارډین د بشري حقونو د څار کمیسیون د راپور په حواله هم همدا یادونه کوي: «د جنسي ځورونو، سياسي او حقوقي جرمونو کړۍ ډېرې پراخې شوي او ښه بهانه د طالبانو په نوم خلک ځورول دي او هېڅوک د بشري حقونو مسؤوليت پر ځان نه مني.»

د بشري حقونو راپور زياتوي، چې د دې ناوړه کړنو پيل د پخواني ولسمشر حامد کرزي د واکمنۍ پر مهال شوی او کرزي د خپلې واکمنۍ په پيل کې ويلي و، چې د ده لپاره امنيت ټينګول تر هر څه مهم دي او د دې لپاره يې جنرال رازق او ګڼو نورو قوماندانانو ته په خلاص مټ اجازه ورکړې وه.

ګارډين زياتوي: «د دې تر څنګ بهرني عسکر هم د جنرال رازق او نورو بشري مجرمانو ملاتړ کوي او دواړه لوري له يو بل څخه ګټه پورته کوي او بهرني عسکر دغه ډول ظلمونه د خپل شتون او بريا مهم راز بولي.»

جنرال رازق چې د خپل ورور تادین په ملګرتیا د ولسي وګړو او خپلو وسله والو مخالفینو د ځورونې، وژنې او تښتونې لپاره شخصي زندانونه لري، ګڼ داسې جنایات ترسره کړي چې په لیدلو، لوستلو یا اورېدلو يې ويښته نېغ ودرېږي.

رازق د ولسي وګړو په وژنه کې دومره وړاندې لاړ، چې په ۲۰۱۴ میلادي کال کې يې د خپل دفتر مخې ته درې تنه ولسي وګړي د تومانچې په ډزو ووژل، خلک د شکایت لپاره تر ارګ ورسېدل خو پايلې يې نه درلودلې.

د جنرال رازق اړوند کسانو په ۲۰۱۵ میلادي کال اګست میاشت کې د هغو وژل شویو طالبانو جسدونه د بولدک ولسوالۍ مرکز کې وسوځول، چې له سرحدي ځواکونو سره نښتو کې وژل شوي و.

زړه بوږنونکی وحشت؛ بې سترګو، بې غاښو او د مخ له پوستوکي پرته جسد

دا د روان میلادي کال د لومړۍ میاشتې کیسه ده، چې د رازق کسانو د یو دوکاندار جسد په داسې حال کې په ښار کې وغورځاوه، چې سترګې، غاښ، پوزه او د مخ پوستوکی يې بشپړ نه و.

جنرال رازق چې په کندهار کې ګڼ خبریالان هم په پیسو اخیستی و، پاتې خلکو يې پر وړاندې د غږ پورته کولو توان په ځان کې نه لید، ځکه به يې په اړه ډېری بهر مېشتو کندهاریانو د هغه جنایات رسنیز کول.

د روان میلادي کال د لومړۍ میاشتې په یوولسمه نېټه بهر میشتي لیکوال محمد شریفي د پنجوايي په دوراهي کې د هغه دوکاندار تصویر خپور کړ، چې رازق يې څېره بدله کړې وه.

شریفي چې ډېری وخت د کندهار د امنیتي وضعیت اړوند تبصرې لیکي، پخپله فیسبوک پاڼه د هغه دوکاندار تصویر خپور کړی و، چې د رازق کسانو يې سترګې ویستلې، غاښونه مات کړي او د مخ پوستوکی يې بشپړ ترې ویستلی دی.

شریفي دغه کس د پنجوايي په دوراهي کې دوکاندار یاد کړی، چې له الکوزي قوم سره اړیکه لري، د هغه اوښتی جسد د اتمې امنیتي حوزې اړوند ساحه کې پیدا شوی دی.

هغه لیکلي و: «یاد کس د لغړیانو او خرکارانو لنډغرو اول ربړولی، شکنجه کړی، سترکي ځني کښلي، پزه او شونډان یې ترې پرې کړې، د مخ پوست يې ځني اړولی، په خوله کي يې غاښونه ورمات کړي، وروسته یې حلال کړی او د اتمي امنیتې حوزې په مربوطاتو کي یې غورځولی وو.»

جنرال رازق په شخصي زندانونو کې سلګونه دوکاندران، سوداګر، محصلین، طالب العلمان، ملا امامان او هر هغه څوک چې د دوی له امرونو يې سرغړونه کوله یا يې د دوی جنایات رسنیز کول، ځورولي او وژلي دي.

یو بل خونړی ګام!

جنرال عبدالرازق چې د امریکایانو لپاره پر اخلاص يې نیویارک ټایمز هم اندېښنه ښوودلې او اعتراف يې کړی چې په یاد زون کې به بیا دغسې اخلاصمن ملګری پیدا نه کړي، د هغوی له یو بل خونړي ګام سره يې هم د هو سر ښورولی و.

نږدې یوه نیمه میاشت وړاندې په کابل کې یو خصوصي تلویزون د بلک واټر کمپنۍ له مشر سره مرکه وکړه او هغه د روانې جګړې د خصوصي کولو وړاندیز وکړ، چې د حکومت د رهبرۍ په کچه يې مخالفت وشو، خو رازق د پردې شاته د دې لوبې د لوبغاړيتوب لپاره منډې ترړې پیل کړې.

هغه د ملي امنیت له پخواني رییس رحمت الله نبیل سره هوکړې ته ورسید او دواړو د بلک واټر کمپنۍ مشر اریک پرینس ته د ۵۰ میلیونه ډالرو په بدل کې د دې جګړې د افغاني جګړه مارو مشرانو په حیث د قبولولو سینې وډبولې.

اریک پرینس لا پر دومره پیسو ورته د هو یا نه ځواب نه و ورکړی، چې جنرال رازق د طالبانو د نفوذي برید ښکار شو.

ویل کېږي، د هغه پر ځای يې ورور تادین سرپرست امنیه قومندان ټاکل شوی، چې په بشري جنایاتو کې يې له هغه سره برابري کوي. خو د کتونکو په نظر د رازق له شتونه پرته یې ورورو تادین په خپلو پلویانو کې هیڅ حیثیت نه لري.

ورته لیکنې

ګډون وکړئ
خبرتیا غوښتل د
guest
2 Comments
زړو
نویو ډیرو خوښو شویو
Inline Feedbacks
ټولې تبصرې کتل
حاجي ناصر

خداوند خو بسيار عادل است .افسوس اينجا است كه خود را مسلمان و مجاهد خطاب ميكنند و در صف كفر كشته ميشوند إز خدوند متعال حسني خاتمه دعا ميكنيم.

اكره الظلم والظالم

الحمدلله اللهم عليك بكل طاغوت وكل ظالم
الحمدلله الذي هلك الظالم عبدالرزاق على يد اخ البطل ابو دجانه

Back to top button
2
0
Would love your thoughts, please comment.x
()
x