غزني؛ امریکایانو پر مدرسه چاپه اچولې، اوه تنه يې وژلي
نن ټکی اسیا (سه شنبه، ۸لړم، ۱۳۹۷ل): د غزني په واغظ ولسوالۍ کې امریکایانو پر مدرسه چاپه وهلې او اوه تنه د مدرسې طالبان يې وژلي دي.
په دې شپنیو عملیاتو کې چې امریکایانو د داخلي عسکرو په ملګرتیا ترسره کړي، مدرسې ته هم مالي زیان اوښتی دی.
پېښه تېره شپه د واغظ ولسوالۍ په سربلند کلا سیمه کې شوې ده.
د غزني ځايي چارواکو په دې اړه څه نه دي ويلي، خو ځايي سرچینې وايي د مدرسې طالبان په خورا وحشت شهیدان شوي دي.
طالب ویاند ذبیح الله مجاهد هم پر پېښه د خپګان تر څنګ دا د بهرنیو او کورنیو عسکرو شریک جنایت بللی دی.
دا په داسې حال کې دی چې طالبانو د همدې ولایت په ده یک ولسوالۍ کې تېره ورځ لویه دیني مدرسه پرانیسته.
دغه مدرسه د رباط کلي کې چې شاوخوا دوه زره کورنۍ پکې هستوګنې دي، ګټې اخیستنې ته سپارل شوې ده.
په ورته وخت کې د پکتیکا په نکه ولسوالۍ کې هم د بهرنیانو او کورنیو عسکرو په شپنیو عملیاتو کې د درنې ملکي مرګژوبلې خبر ورکړل شوی دی.
