د ولس له غمه بي پروا حکومت

نن ټکی اسیا – سرلیکنه
د تیرې پنجشنبې په ماخوستن د کابل ښار په دویمې ناحیې د نادرپښتون جادې په خیر خوا مارکیټ کې اورولګیده چې وروسته پنځو نورو مارکیټونو ته هم ورسیده او سوداګرو ته یې په میلینونو ډالره تاوان ورساوه.

د پیښې د عیني شاهدانو په وینا چې اور لومړی د خیر خوا مارکیټ په یوه څنډه کې ولګیده خو د اطفايي د ناوخته رسیدو له کبله هغه په ډیره چټکي سره د ساحې نورو مارکیټونو ته سرایت وکړ.

محمد ابراهیم رسولی، په کابل ښار کې د الکترونیکي سامان الاتو د اتحادیې مشر وايي چې پوره دولس ساعته د کابل په همدې مهمې تجارتې سیمې کې دُکاندارانو په خپلو سترګو لیدل چې په دُکانونو یې اوربلیږي او څوک یې د خاموشه کوله هڅه نه کوي.

کوم امنیتي کسان او د اطفايي مامورین چې سیمې ته د اور وژنې لپاره راغلي وو هغوي د اور وژنې په ځای د دکانونو د مالونو او برقي توکو په چور او تالان مصروف وو.

د نادر پښتون جاده د ارګ په خوله کې پرته ده چې یواځې د مالیې او عدلیې وزارتونو ودانې یې د ارګ له ورودې دوازې څخه بیلوي ، په دغسي یوه مهمه سیمه کې چې دولت په ۱۲ ساعته کې د اور وژلو توان نه لري هغوی به بیا بل کوم ځای د ولسي شتمنیو د ژغورولو پروا وکړي؟

د سوځیدلې ساحې دکانداران وايي چې په دغې پیښې کې خواوشا زردکانونه سوځیدلې ، خو په ګډ حکومت کې د پوښتنې هیڅوک نشته چې له اړونده چارواکو څخه د دغې سترې بي غورې پوښتنه وکړي ؟

ایا تر دې وروسته به کوم سوداګر دیته زړه ښه کړي چې په دغسي شهر ناپرسان کې پانګونه وکړي؟

دا چې له یوې خوا د همدې بیواکه او بي پوښتنې حکومت په واکمني کې پانګوال د ارګ په دروازه کې د پیښو په عوض کې اختطاف کیږي او له بلې خوا یې په عین همدې سیمې کې له شتمنیو سره دغسي بي پروايي کیږي فکر نه کیږي چې نور دي څوک د هیواد په داخل کې پانګونې ته زړه ښه کړي.

ارګمشر د دې په ځای چې په دې پیښه کې له متضرر شویو سوداګرو سره خواخوږي وښيي او د هغوی د دلجويي په غرض سیمې ته ورشي د بیا ځلي کاندید کیدو لپاره په خپلو کمپایني هلو ځلو لګیادی او د ولایت د ودانۍ پرانیستلو په پلمه یې ځان د پکتیکا ولایت ته رسولی دی.