سولې شورا: په لنډ وخت کې طالبانو سره د خبرو لپاره پلاوی ټاکو

نن ټکی اسیا (شنبه، ۱۹ لړم، ۱۳۹۷ل): په مسکو کې د افغانستان سولې په اړه د روسيې په کوربه‌توب له ناستې يوه ورځ وروسته د ګډ حکومت د سولې عالي شورا ويلي، په لنډ وخت کې له طالبانو سره د خبرو لپاره پلاوی ټاکي.

د سولې عالي شورا دا غوښتنه په داسې حال  کې کړې، چې تېره ورځ د طالبانو د سياسي دفتر مشر شېر محمد عباس ستانکزي په مسکو کې رسنيو ته وويل، چې د افغانستان کړکېچ د بهرنۍ برخې د پای ته رسولو لپاره لومړی له امریکا سره خبرې کوي او تر څو، چې  امریکا سره خبره نه وي شوي، له افغان اړخ سره خبرې نه کوي.

د سولې عالي شورا غړی عبدالرحيم بيګ وايي، «موږ تياری کوو، چې له طالبانو سره د خبرو لپاره باصلاحيته او مناسب پلاوی وټاکو چې له طالبانو سره ګټورې خبرې وکړي.»

د سولې عالي شورا دا وړانديز په داسې حال کې کړی، چې د افغانستان سولې لپاره د امریکا د بهرنيو چارو وزارت خاص استازي زلمي خليلزاد يو ځل به د افغانستان، پاکستان، متحده عربي اماراتو او قطر سفر پيل کړی دی.

خلیلزاد د ګډ  حکومت له اجرائيه رئیس عبدالله عبدالله سره ليدلي دي.

د اجرائيه رياست د وياند مرستیال اميد ميثم په کابل کې  رسنيو ته وويل، چې اجرائيه رئیس د خليلزاد سفر د سيمې او افغانستان لپاره ګټور بولي.

تېره مياشت هم خلیلزاد له افغانستان، پاکستان او متحده عربي اماراتو وروسته په قطر کې د طالبانو استازو سره د افغانستان په موضوع خبرې کړې وې او شونې ده هغه يو ځل بيا د افغانستان د روان بحران په پای ته رسولو له طالبانو سره مخامخ خبرې وکړي.