ميدان وردګ: دولس امنيتي سرتيرو ته مرګ ژوبله اوښتې ده

نن ټکی اسیا (چهارشنبه، ۲۳لړم، ۱۳۹۷ل): د ميدان وردګ ولايت په سيد اباد ولسوالۍ کې په يوې امنيتې پوستې د طالبانو په بريد کې ۱۲ سرتيرو ته مرګ ژوبله اوښتې.

د ميدان وردګ د امينه قومندانۍ وياند حکمت الله دراني رسنيو ته ويلي دي چې طالبانو تيره شپه د سيد اباد ولسوالۍ په «منګلي» سيمه کې د عسکرو په پوسته بريد وکړ چې له امله يې ۹ سرتيري وژلي او درې نور ټپيان کړي دي او طالبانو پوسته نيولې ده.

درانې وويل چې سيمې ته نور تازه دم سرتيري رسېدلي او د پيښې سيمه ېې په خپل کنټرول کې اخيستې ده.

د ميدان وردګ د ولایتي شورا غړي حاجي احمد جعفري وويل چې په دې ولسوالۍ د طالبانو د نورو بريدونو امکان هم شته دی.

بل لور ته د طالبانو ویاند ذبيح الله مجاهد هم ويلي دي چې د سيد اباد ولسوالۍ په جګړه کې يې ۳۳ سرتيري وژلي دي او يوه اندازه وسله يې هم نيولې ده.

سيد اباد د ميدان وردګ ولایت يوه نسبتاً نا امنه ولسوالي ده چې ډيری وخت ورڅخه د جګړو راپورونه ورکول کيږي.

څو مياشتې وړاندې هم طالبانو د سيد اباد ولسوالۍ په مرکز بريد کړی و چې له امله يې ددې ولسوالۍ امنيه قومندان په ګډون ګڼ شمیر امنيتي سرتيري وژلي وو.

د ګډ حکومت په راتګ سره په افغانستان کې امنیتي وضعيت تر بل هر وخت د ترينګلتيا لوري ته روان دی چې له امله يې د امنيتي ځواکونو په تلفاتو کې هم زياتوالی راغلی دی.

وړمه ورځ د ګډ حکومت مشر محمد اشرف غني د واشنګټن يو پوهنتون غونډې ته په خبرو کې ويلي وو چې په تيرو څلورو کلونو کې څه له پاسه ۲۸ زره افغان عسکر په افغانستان کې وژل شوي دي.

avatar
  ګډون وکړئ  
خبرتیا غوښتل د