د امریکا د بهرنیو چارو وزارت ویانده

امریکا: د خاشقجي په قضيه کې تر اوسه وروستۍ پايلو ته نه يو رسېدلي

نن ټکی اسیا (یکشنبه، ۲۷ لړم، ۱۳۹۷ل): د امريکا د بهرنيو چارو وزرات ويلي، د ټرمپ اداره تر اوسه دې پایلې ته نه ده رسېدلې، چې ايا سعودي حکومت د جمال خاشقجي د وژنې مسؤول دی که نه؟

د امریکا د بهرنيو چارو وزارت وياندې هيتر نوريټ ويلي، په استنبول کې د وژل شوي سعودي خبريال د وژنې په اړه لا هم ګڼ شمېر پوښتنې بې ځوابه پاتې دي.

د بهرنيو چارو وزارت وياندې دا څرګندونې په داسې حال کې کړي، چې تېره ورځ واشنګټن پوسټ د امريکا د مرکزي استخباراتو «سي ای اې» د سرچينو په حواله ليکلي و، چې جمال خاشقجي د سعودي ولي عهد محمد بن سلمان په امر وژل شوی دی.

په عين حال کې د امریکا د ماليې وزارت د خاشقجي د وژنې په قضيه کې پر اوولسو مهمو سعودي مشرانو بنديزونه لګولي دي.

په دغو کسانو کې د ولي عهد بن سلمان نږدې سلاکار سعود القحطاني او په استنبول کې د سعودي قونسل جنرال محمد العتیبي هم شامل دي، چې د جمال خاشقجي له وژل کېدو وروسته له استنبول څخه په تېښته بریالی شو او وروسته له دندې هم ګوښه کړی شو.

سي ای اې د خپلې څېړنې په پایلې کې ويلي، چې جمال خاشقجي د بن سلمان په امر وژل شوی دی.

تر دې وړاندې هم امریکايي رسنيو ليکلي و، چې سعودي ولي عهد د امریکا د ملي امنيت سلاکار جان بولټن او همدارنګه د ټرمپ ارشد سلاکار او زوم جاريډ کوشنیر ته هم ویلي و، چې جمال خاشقجي  د اخوان المسلمین غړی او خطرناک اسلامپال دی.

خو سعودي عربستان په دې اړه په رسنيو کې خپاره شوي راپورونه رد کړي او ټينګار کوي، چې د خاشقجي په وژنه کې د بن سلمان لاس نشته، بلکې هغه د لوړپوړي استخباراتي چارواکي په امر وژل شوی دی.

يو شمېر امريکايي او برتانوي رسنيو دا هم ليکلي، چې د اسرائيلو لومړی وزير بنيامين نتنياهو او د ټرمپ زوم او سلاکار جاريډ کوشنیر د بن سلمان د ژغورلو لپاره هلې ځلې کوي او ټينګار یې کړی، چې اسرائيلو او امريکا لپاره په منځني ختيځ کې تر بن سلمان بل باوري سټراټيژيک ملګری نه موندل کيږي.

avatar
  ګډون وکړئ  
خبرتیا غوښتل د