طالبان: زابل کې یې 9 دولتي سرتیري د نفوذي ملګري په مټ ژوندي نیولي

نن ټکی اسیا (دوشنبه، ۲۰ لړم ۱۳۹۷): طالبانو خبر ورکړی چې د زابل په شینکۍ او فاریاب کې یې 9 عسکر ژوندي نیولي او 5 نور یې وژلي دي.

طالبانو پخپله خبرپاڼه کې ویلي چې تېر ماښام یې د زابل ولایت د شینکۍ ولسوالۍ اړوند د دوستۍ کلي ته څیرمه د کریش ستراتیژیکه پوسته د خپل یو نفوذي بریدګر په مټ نیولي او 9 تنه دولتی سرتیري يې ژوندي اسیران کړي او 2 نور یې ځای پرځای وژلي دي.

طالبانو زیاته کړي، چې په پوسته کې یې د دوی په وینا له دښمن څخه یو رینجرموټر، 9 کارملي ټوپکونه، 4 کلاشینکوفونه، 1 راکټ، 1یوثقیل، 5 صندوقه د پیکا، او ګڼ شمېر نوري مرمۍ اومهمات د دوی د جنګیالیو لاس ته ورغلي.

طالبانو ویلي چې د دوی اړخ ته کوم زیان نه دی رسیدلی.

بل خوا له فاریاب څخه هم طالبانو خبر ورکړی چې د قومندان عبدالباقي په ګډون یې 8 تنو اربکي سرتیرو ته مرګ ژوبله اړولي.

طالبانو ویلي چې د یاد ولایت، خیبر ولسوالۍ د بورغن پایان سیمه کې د قزلرقلعه په نوم کنډک باندې د دوی جنګیالیو تېره شپه ناوخته برید کړی، د قومندان عبدالباقي په ګډون یې 3 تنه اربکیان ځای پرځای وژلي، د طالبانو په وینا چې مړي یې اوس هم هلته پاتي دي، او 5 نور یې زخمیان کړي دي.

د طالبانو خبرپاڼه کې ویل شوي چې په یاده پېښه کې 2 تنه طالبان هم زخمیان او یو بل تن وژل شوی.

دولتي ځواکونو د یادو دواړو پیښو په اړه تراوسه رسنیو ته څه نه دي ویلي.

باید وویل شي چې پر دولتي ځواکونو د طالبانو بریدونه په داسي حال کې زیات شوی چې د امریکایي او طالب استاځو ترمنځ د سولي په رابطه د لیدنو کتنو لړۍ هم خورا ګرمه ساتله شوي، دوې ورځي وړاندي امریکایی استاځي زلمي خلیلزاد په قطر کې له طالب استاځو سره درې ورځي پرلپسې لیده کاته وکړل.

avatar
  ګډون وکړئ  
خبرتیا غوښتل د