نړۍ

ټرمپ: د سوريې بيا رغونه به زموږ پر ځای سعودي کوي

نن ټکی اسیا (سه شنبه، ۴مرغومي، ۱۳۹۷ل): د امريکا ولسمشر ډونلډ ټرمپ ويلي، سعودي د سوريې بيا رغونې لپاره د پانګې ورکولو په اړه هوکړه کړې او د امريکا متحده ايالاتو پر ځای به دغه کار سعودي کوي او په دې اړه يې له سعودي مننه هم کړې ده.

ټرمپ په خپل ټويټر پيغام کې ويلي: «سعودي چارواکو منلې، چې د امریکا پر ځای به د سوريې د بيا رغونې  لګښت پر  غاړه اخلي.»

هغه په خپل ټويټ کې زياته کړې: « پر ځای د دې، چې  ستر دولتونه له پنځه زره ميله لرې هلته ابادي کوي، دا ښه خبره ده، چې فاحش مالداره دولتونه په خپلو پانګو کې د خپلو ګاونډيو هېوادونو مرسته وکړي او په دې اړه له سعودي مننه کوم.»

ټرمپ دا څرګندونې وروسته تر هغه کړي، چې تېره اوونۍ نوموړي له سوريې د خپلو دوه زرو پوځيانو د وېستلو پرېکړه وکړه.

يو شمېر څارونکي وايي، امريکا له ترکيې سره هوکړه کړې، چې د داعش پر ضد جګړه به ترکي پوځيان پر مخ بيايي او د سوريې  د بيا رغولو چارې به سعودي پر غاړه اخلي او په دې لړ کې به د سيمې دولتونه د سوريې په اړه خپل مسؤولیتونه ادا کوي.

تر دې لږه شېبه وړاندې ټرمپ په يوه بل ټويټر پيغام کې ويلي و، چې د ترکيې ولسمشر رجب طيب اردوګان ده ته په سوريه کې د داعش د له منځه وړلو په اړه بشپړ معلومات ورکړي دي.

د امریکا ولسمشر ويلي، چې له خپل ترکي سيال سره يې د داعش ځپلو په اړه ډېرې ګټورې سلامشورې کړي دي او چې امريکايي پوځيان له سوريې وځي، پر ځای به يې دغه خلا ترکي پوځيان ډکوي.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x