طالبانو سعودي عربستان کې له حکومتي پلاوي سره ناسته رد کړه

نن ټکی اسیا (شنبه، ۸مرغومي، ۱۳۹۷ل): طالبانو په سعودي عربستان کې د افغان دولت له پلاوي سره د ناستې خبرونه رد کړل.

تيره ورځ يو شمير رسنيو د افغانستان د سولې شورا غړيو له قوله خبر ورکړی و چې ښايي په نژدې راتلونکې يو حکومتی پلاوی په سعودي عربستان کې له طالبانو سره وګوري.

د طالبانو وياند ذبيح الله مجاهد له لوري رسنيو ته په لېږلې خبر پاڼه کې راغلي دي چې په سعودي عربستان کې له حکومتي پلاوي سره د ناستې خبرې له حقيقت نه لري دي او په وينا يې په دې اړه د اسلامي امارت په دريځ کې کوم تغير نه دی راغلی.

خبر پاڼه زياتوي چې«مونږ د يو قوي او سنجول شوي پلان له مخې له امريکايانو سره د مذاکراتو بهير پرمخ وړو ترڅو زمونږ د هيواد افغانستان اشغال پای ته ورسيږي».

په خبر پاڼه کې راغلي چې د مذاکراتو له پروسې سره بايد سطحي چلند ونشي او نه هم چاته بې ځايه هيلې ورکړل شي او نه دې هم له دې بهير څخه تبليغاتي استفاده کيږي.

د يادونې وړ ده چې تيره اوونۍ په متحده عربي اماراتو کې له امريکايي پلاوي سره د طالبانو له ناستې سره هم مهاله ابوظبۍ ته د افغانستان د حکومت يو پلاوي هم سفر کړی و او هيله يې درلوده چې له طالبانو سره وګوري خو طالبانو ورسره له ناستې انکار وکړ.

تبصرې (1)

  • د طالبانو سره د سولی د مذاکراتو اصلی علت همدغه چه د کابل غلامه اداره په کی مشروعیت تر لاسه کړی یعنی هغه څه چه په ۱۸ کلو خونړی جنګ کی یی ترلاسه نه کړی شول اوس یی د ګوډ شیطان په هلو ځلو د مذاکراتو د نوم لاندی ترلاسه کول غواړی کوم چه خوب او خیال اومهال ښکاری .
    دوی د طالب مجاهدینو په اړه هم د پرونو اماتورانه مجاهدینو فکر کوی او لا پری د القاعدی د نامنظمو کړنو او لا ورته د عربو احساساتی پسرلی ښکاری چه تلفات او خسارات به دوی خو ګټه به یی اشغلګر تر لاسه کړی اودوی به اخره کی ذوپ یا کنګل کړی،
    که نه د دی اړه نه وه چه مذاکرات دی له قطر غیره او له مدعی مدعی علیه غیره پکی د دریم ګړو د منځیګړیتوب اړه وی امریکا وایی چه مونږ وځو او طالبان هم وایی چه تاسی ووځی نو نور څه پاتی دی چه دوی ورباندی حتی مذاکرات کوی څرنګه چه راغلی هغسی دی ووځي ، هو د ارام وتلو د پاره دی د افغانستان مظلوم او مجاهد اولس ته د تلفاتو او خساراتو جبران ورکړی طالبان به یی لکه د روسانو په شان ارام وتلو ته پریږدی او حتی د یو څو اونیو یا میاشتو د وتلو مهال ویش هم ورسره ومنی او بس .
    د دی د پاره چه د کابل غلامه اداره د نجیب د برخه لیک سره مخ نه شی له ځانه سره دی خبلو هیوادو ته وباسی هلته به د بیلونو ډالرو سرمایه ګذاری وکړی هم به یی مونږ له شره وژغورل شو او هم به یی اشغلګر له غصب شوو او فسادی ډالرو دوباره استفاده وکړی او لا به یی ورله کنګل کړی ، مونږ که دوی ته اړه لرو هغه د دوی علنی محاکمه ده او بس .