د راتلونکو مثبتو خبرو د ژر پیلیدو په هیله

نن ټکی اسیا – سرلیکنه: تقریبا تر یوې اونۍ مسلسلو خبرو او چنو وهلو وروسته تیره ورځ مازدیګر مهال په دوحه کې د طالبانو او امریکايي استازي زلمي خلیلزاد ترمنځ مذاکراتي بهیر د یوې مشترکې اعلامیې له صادرولو پرته پایته ورسیده .

که څه هم چې ظاهرا یاد بهیر له کومې ملموسې پایلې پرته پایته ورسیده ، خو د شنونکو په باور چې په یاد شپږ ورځني جر و بحث کې د افغان لانجې ډیر پیچلې اړخونه را سپړل شوي او په هواري یې د طرفینو ترمنځ اوږدې خبرې شوې دي.

د بهرنیو ځواکونو د وتلو مهال ویش او په افغانستان کې د اوربند اعلان د مذاکراتي لوریو ترمنځ د نزاع او نقاش وړ هغه ټکي دي چې لا هم لاینحل پاتې دي خو په اړه یې د طرفینو ترمنځ ډیرې خبرې شوې دي.

د مذاکراتي بهیر دواړه لوري باوري دي چې د دوی ترمنځ روانې خبرې له یولړ خاص جدیت او اهتمام سره مل وي چې دا نقطه ورکي ډیره هیله بښونکې او د دې ښکارندویه ده چې د مذاکراتي بهیر راتلونکی اساسي پړاو به د دواړو لوریو د لوړو پوړو او باصلاحیته استازیو لخوا بیا پیل شي.

خو که خدای وکړي چې د مذاکراتي بهیر راتلونکی پړاو ژر پیل شي ښه به وي ، ځکه چې د طرفینو ترمنځ پوځي جبهه لا هم پرانیستې پاتې ده او د خبرو په همدې مقطعي جریان کې به هر یو د مقابل لوري مغلوب کولو په غرض جنګي زور آزمايي کوي چې له ډیره بده مرغه د دې جنګي سیالۍ زور به هم تر ډیره له افغان ولسه ضائعات اخلي او د هلمند، کونړ ، لوګر، ننګرهار او خوست په څیر خونړۍ پیښې به ورکې رامنځته کیږي.

د ګډ حکومت له منځته راتلو او له امریکا سره د امنیتي تړون تر لاسلیکولو وروسته خپله د ولسمشر غني په اعتراف تنها د دولتي لوري تائید شوي تلفات ۴۵۰۰۰ کسان دي چې له شکه پرته دا سخت ټکان ورکوونکي ارقام دي.

له بلې خوا په تیرو نهو میاشتو کې د امریکایانو له خوا پر افغانانو باندې د ۶۰۰۰ زره بمونو غورځول چې یواځې یوه یې تیره میاشت د هلمند په سنګین ولسوالۍ کې د یوې کورنۍ دیرش تنه غړي ووژل په لسګونو زره ولسي افغانان وژلي چې په دې سره هم د امریکایانو په خلاف او هم د هغوی په دفاع کې اصلي متضررین افغانان دي چې د تحمیلې جګړې ټول زور د دوی تر سینه خیږي.

خدای دې وکړي د جانبینو ترمنځ راتلونکي غونډې ژرپیل او په هیواد کې د ویرزیږوونکې جګړې په خاموشه کولو باندې پایته ورسیږي.