نیوزېلنډ؛ هند لوبډلې ته تاریخي ماتې ورکړه

نن ټکی اسیا (چهارشنبه، ۱۷ سلواغه، ۱۳۹۷ل): د هندوستان او نیوزېلنډ کرېکټ لوبډلو ترمنځ له پنځه یو ورځنۍ سیالیو وروسته د شل اوریزو سیالیو لومړۍ لوبه نن د چهارشنبې په ورځ ترسره شوه چې په کې نیوزېلنډ هند ته تاریخي ماتې ورکړه.

هند لوبډلې په لومړي وار په شل اوریزو سیالیو کې د زیاتو «۸۰» منډو په توپير ماتې وخوړه، له دې وړاندې یې په ۴۹ منډو له استرالیا او په ۴۷ منډو له نیوزیلنډ څخه ماتې خوړلې وه، دا د هند لوبډلې په شل اوریزو سیالیو تاریخ کې تر ټولو ستره ماتې ده.

دغه لوبه چې لومړی د نیوزیلنډ لوبډلې توپوهنه وکړه په ټولو شلو اورونو کې یې د ۶ لوبغاړو په سوځېدلو «۲۱۹» منډې جوړې کړې، ددوی لخوا ټيم سیفرټ په ۴۳ توپونو چټکې ۸۴ منډې جوړې کړې، نوموړي ۶ شپږیزې او ۷ څلوریزې هم ووهلې.

په ځواب کې د هند لوبډله له سختې ماتې سره مخ شوه او د ټولو لوبغاړو په سوځېدلو یې په ۱۹.۲ اورونو کې د ایم ایس دهوني زیاتو ۳۹ منډو په مرسته ټولې «۱۳۹» منډې جوړې کړې، چې د ۸۰ منډو په ستر توپیر یې ماتې وخوړه.

له دې وړاندې د دواړو لوبډلو ترمنځ د پنځه یو ورځنیو سیالیو سیریز ترسره شو، که دغه سیالۍ هند لوبډلې په ۴-۱ وګټلې خو نیوزیلنډ لوبډله توانېدلې وه په یوه لوبه کې د هند ټوله لوبډله یوازې په ۹۲ منډو وسوځوي، ددوی ترمنځ به دویمه شل اوریزه لوبه د جمعې په ورځ په اتم فبروري ترسره شي.

د نن ټکی اسیا موبایل اپلیکیشن
avatar
  ګډون وکړئ  
خبرتیا غوښتل د