د طالبانو سفرونه نورو ملکو ته 

د، ب، هيښ

زموږ ډېر غټ مشکل دا دئ  ، چې د وخت او حالاتو تشخيص سم نه شو کولائ او د ننګونو او پرابلمونو سره د مقابلې په طريقه سم نه پوهيږو . حال داچې د پرون او نن په منځ کې ژورو تغيراتو او تحولاتو صورت موندلئ دئ .

د امريکايي اشغال د شروع نه تر نن پورې د افغانستان ، منطقې او جهان  په سياسي -اجتماعي-اقتصادي- ثقافتي او تکنالوژيکي  حالت کې ډېر بدلون راغلئ دئ .

نه هغه د بريژنيف دوخت سوسياليستي روسيه شته ، نه د مشرف دوخت پاکستان او نه د بوش د وخت امريکا .

دسياست په ډګر کې نوي اکټوران دنويو هدفونو د پاره راغلي دي او د پخوانيو اکتورانو د مثبتو او منفي کړنلارو نه په استفادې د خپلو ملکونو پاليسي جوړوي .

طالبانو په خپله حق طلبانه مبارزه او پریمانه قربانۍ د منطقې او جهان نظرونه داسې واړول چې دپرون تعقيبولو ، زنداني   کولو ، ترورولو او په سر يې دانعام اخستلو سياست يې  باطل او ناکام کړ او نن ورځ  ورته ديوه سيال او د افغانستان ، منطقې او جهان  د مشکلاتو د حل کولو دپاره ديوه مؤثر ، مهم او اجتناب ناپذيره اړخ په سترګه کتل کيږي  او رسمي يې د ملاقاتونو دپاره دعوت کوي .

دهمسايه ګانو ، نورو هيوادونو او غربيانو دا شان تعامل دهغوی درحم ، زړه سواندۍ او شفقت له کبله نه دئ ،بلکې د طالبانو د قاطع  ، خلل ناپذيره ، مستقل، واضح، عادلانه  او په ديني -ملي اصولو ولاړ سياست نتيجه ده ، چې نوريې معتقد او مجبور کړل ، چې ورسره دزور او ترور په عوض د خبرو ،ديپلوماسۍ او مذاکراتو له لارې توافقاتو او تفاهماتو ته ور سيږي .

يوه خبره بايد ټول ښه په غور او دقت واوري ،هغه داچې طالبان د چا غلامي نه مني او د اولس په ازادۍ او استقلال باور لري ، دهمدې د پاره يې خپل سياسي قدرت او امارت قر باني کړل او د ارګ او ادارې د سهولت او خوند په ځای يې د غرونو اود مبارزې مشقت ته ترجيح ورکړه .

طالبان بايد په منطقه اي او جهاني سطحه د هر تريبون او ستيج نه د خپل موقف د بيانولو او دفاع نه استفاده وکړي او خپله داعيه چې د افغانستان ازادي -استقلال ، د همسايه نه نيولې تر جهانه دنورو په داخلي امورو کې نه مداخله او دهغوی له لوري هم دا پرنسيپ مراعاتول ، د متقابله احترام  او پارتنرشيپ په اساس داړيکو جوړول او د منطقې او جهان دسولې او ثبات له پاره صادقانه کارکول دي بيان کړي .

د طالب تګ روسيې ته او يا چين ، جرمني او پاکستان ته نه د زاريو د پاره دئ او نه د ننواتې دپاره ، بلکې ديوه قوي او مطرح لوري په شکل يو ضرورت دئ ترڅود منطقې او جهان د پرابلمونو د حل د پاره د طالبانو دقوت وڼده په لاس راوړل شي او استفاده ترې وشي  او  دا د طالبانو د پاره لوی بری ډئ چې دښمنان ، غرضيان ، مرضيان او احساساتيان يې نه شي زغملائ او په اپلتو يې شروع کړې ده .