لوګر: ګډو ځواکونو د ملا امام په ګډون درې تنه وژلي «انځورونه»

نن ټکی اسیا (جمعه، ۳ کب، ۱۳۹۷ل): د لوګر ولایت په برکي برک ولسوالۍ کې د ګډو ځواکونو په شپنيزو عملياتو د يو ملااما م په ګډون درې تنه وژل شوي دي.

د سيمې اوسېدونکي وايي چې تيره شپه ګډو ځواکونو د بره کي برک ولسوالۍ په زرسنګ کلي کې د عامو خلکو په کورونو چاپه واچوله چې په نتيجه کې يې د مولوي صداقت په نامه د جومات ملا امام په ګډون درې تنه وژلي دي.

سرچينه زیاتوي چې په دې چاپه کې د احمد شاه او محمد صادق په نامه دوه تنه نور ولسي وګړي هم وژل شوي دي.

د سيمې خلک وايي چې ګډو ځواکونو تېره شپه په ياد کلي کې د عامو خلکو د کورونو دورازې هم په بمونو الوځولي دي او ګڼ مالي تاوانونه يې ور رسولي دي او ددې سربيره يې د سيمې دوه جوماتونه هم نړولي دي.

د يادونې وړ ده چې څو ورځې وړاندې په کاپيسا ولايت کې د حميديه په نامه يوه پخوانۍ تاريخي مدرسه هم د ګډو ځواکونو له لورې نړول شوې وه چې په افغانستان کې يې د ګڼو خلکو احساسات راپارولي دي.

با يد وويل شي چې په دې وروستيو کې د ګډو ځواکونو له لوري شپنيز عمليات او چاپې زياتې شوي دي چې په نتيجه يې زياته مرګ ژوبله او مالي زيان ولسي وګړو ته اوړي.

avatar
  ګډون وکړئ  
خبرتیا غوښتل د