د قطر غونډې متوقعې پایلې 

د نن ټکی اسیا سرمقاله

نن دریمه ورځ هم د قطر په پلازمینې دوحه کې د طالبانو او امریکايي چارواکو ترمنځ مذاکراتي غونډه په نورمال ډول جریان لري.

د غونډې د خبرو محوري ټکی له افغانستان څخه د بهرنیو ځواکونو پرشا تګ او افغانستان د امریکا ګواښونکو ډلو په میشتن ځای نه بدلیدل دي.

د غونډې د برخوالو له لوري د ورکړل شویو معلوماتو له مخې د طالب مذاکراتي ټیم او امریکايي استازو ترمنځ پنځمه ناسته د تیرو شویو غونډو په نسبت مثمره او د عملي کار په پیلولو سره مخته روانه ده.

تر اوسه پوري په غونډه کې د طرفینو ترمنځ کوم د مشاجري او اختلاف وړ څه نه دي پیښ شوي او له دواړو لورو څخه کاري ګروپونو تشکیل شوي چې د اجنډا د محتویاتو د عملي کولو په لارو چارو بحث وکړي.

ښايي یاد جر و بحث تر درویو څلورو ورځو پوري وغزیږي.

د قطر روانه غونډه له څو اړخونو څخه د اهمیت وړ ده:

لومړی دا چې د هغې په پرانستونکې برخه کې د طالبانو د مشرتابه مرستیال ملا عبدالغني برادر شتون درلود چې له اجرايي لحاظه د اړونده موضوعاتو په اړه د تصمیم نیولو واک ورسره دی.

دوهم داچې په یاده غونډه کې یوازې د قضیې اصل لوري (طالبان ـ امریکایان) شتون لري .

دریم دا چې اجنډا یې هغه اتفاقي موضوع ده چې دواړه لورې یې په عملي کیدو له کوم ختلاف پرته توافق نظر لري.

که د غونډې پاتې ورځې هم په همدغه ډول پرمخ ولاړې شي امید شته چې پایلې به یې ښې مثبتې وي.

یواځینی هغه څه چې د یادې ناستې د انعقاد په مهال جریان لري او ښايي د غونډې په بهیر منفي اغیز وکړي هغه د غونډې له جریان سره هم مهاله د هیواد په دننه کې د امریکايي اشغالګرو او د هغوي د داخلي حمایتي ځواکونو لخوا پر ولسي خلګو ، مدارسو ، مسجدونو او صحي مرکزونو باندې بمباري او شپني عملیات دي چې هره ورځ ورکې په لسګونو ولسي افغانان وژل کیږي او شخصي شتمنۍ یې د برید ګرو لخوا تخریب اوضائع کیږي.

همدا وجه ده چې طالبانو د دغو عام وژنو او بریدونو د مخنیوي او محکومه ولو په غرض همدا نن د ملګرو ملتونو ، اسلامي کانفرانس او د جنګي جرمونو محکمې په نوم تفصیلي لیک نشر کړی او په هغه کې له یادو جهتونو څخه غوښتي چې په افغانستان کې د امریکایانو او د هغوی د حمایتي ځواکونو د دغو بشرضد کړنو او وحشیانه بمباریو مخه ونیسي.