طالبانو په قطر کې د مذاکراتو د روان بهير په اړه وضاحت وکړ

نن ټکی اسیا (یکشنبه، ۱۲کب، ۱۳۹۷ل): په قطر کې د طالبانو او امريکايي لوري ترمنځ د مذاکراتو پنځمه غونډه اوس هم روانه ده او په روانه غونډه کې له افغانستان څخه د بهرنيو ځواکونو وتل او نورې نړۍ ته د نه تهديد په اړه بحثونه کيږي.

د طالبانو له لوري په تازه خپره شوې خبرپاڼه کې راغلي چې د قطر روان مذاکرات په تدريجي توګه او محتطانه ډول پرمخ‌ ځي او تر اوسه په کومه مسوده او سند باندې توافق نه دی شوی.

ذبيح الله مجاهد وايي چې موضوعات ډېر حساس دي او په ياده غونډه کې د تيرې جنورۍ د مياشتې په موضوعاتو چې له افغانستان څخه د بهرنيو ځواکونو وتل او له دې هيواد څخه نورې نړۍ ته د نه ګواښ ډاډ ورکول وو، خبرې کيږي.

نوموړي زياته کړې ده چې له يادو موضوعاتو پرته د قطر د غونډې په اړه نور راپورونه او اټکلونه حقيقت نه لري.

د يادونې وړ ده چې له تيرې ورځې راهيسې یو شمير رسنيو راپورونه خپاره کړل چې په قطر کې د طالبانو او امريکا ترمنځ روانې غونډې ته د ملګرو ملتونو، د اسلامي همکاريو سازمان او ناروې هيواد پلاوي هم رسېدلي او ويل شوي وو چې دوی به د طالبانو او امريکا ترمنځ په کېدونکي تړون کې د ضمانت کوونکو په توګه ګډون کوي خو طالبانو ويلي دي چې تر اوسه په کومه مسوده او سند توافق نه دی راغلی.