کرېکټ: پاکستان ته د استرالیا په لاس پرلپسې دویمه ماتې

نن ټکی اسیا (یکشنبه، ۴ وری، ۱۳۹۸ل): د پاکستان او استرالیا لوبډلو ترمنځ د پنځو یو ورځنیو سیالیو لړۍ په عربي اماراتو کې د پاکستان په کوربه توب پېل شوې ده.

دغه یو ورځنۍ سیالۍ چې لومړۍ لوبه یې د جمعې او دویمه یې نن د یکشنبې په ورځ ترسره شوه، پاکستان لوبډلې د استرالیا لوبډلې په لاس پرلپسې دویمه ماتې وخوړه.

په لومړۍ سیالۍ کې د حارث سهیل سلیزې په مرسته پاکستان لوبډلې په ټاکلو پنځوس اورونو کې «۲۸۱» منډې جوړې کړې وې، چې استرالیا لوبډلې په ځواب کې د لوبډلمشر آرون فینچ په زړه پورې سلیزې په مرسته ټاکلی هدف د درې لوبغاړو په سوځېدلو په ۴۹ اورو کې بشپړ کړ.

په ننۍ سیالۍ کې چې پاکستان لوبډلې یو وار بیا لومړی توپوهنه وکړه د محمد رضوان سلیزې او شعیب ملک نیمه سلیزې په مرسته استرالیا ته د «۲۸۵» منډو هدف وټاکه.

په ځواب کې د آرون فینچ او عثمان خواجه په زړه توپوهنې سره استرالیا ټاکلی هدف د ۲ لوبغاړو په سوځېدلو په ۴۸م اور کې بشپړ کړ، آرون فینچ د یادې لړۍ پرلپسې دویمه سلیزه هم ووهله، نوموړي د ۶ شپږیزو او ۱۱ څلوریزو په مرسته «۱۵۵» ناسوځېدلې او عثمان خواجه «۸۸» منډې جوړې کړې.

د پاکستان لوبډلې لخوا په توپ اچونه کې یوازې یاسر شاه یوه ویکټه واخیستله، یو لوبغاړی رن اوټ شو خو نور ټول توپ اچونکي له ویکټې اخیستلو بې برخې پاتې شول.

avatar
  ګډون وکړئ  
خبرتیا غوښتل د