زابل؛ عسکرو د معاشونو د ځنډ له امله لاریون کړی

نن ټکی اسیا (پنجشنبه، ۲۲وری، ۱۳۹۸ل): زابل کې د شهرصفا ولسوالۍ پولیسو او اربکیانو د معاشونو د ځنډ له امله لاریون وکړ او د کابل ـ کندهار لویه لار يې شاوخوا څلور ساعته وتړله.

لاریون کوونکو پولیسو او اربکیو نن په یاد ولایت کې د کابل ـ کندهار د لويې لارې سلګونه مسافر تر غرمې پورې وځنډول، چې په وینا يې له دریو میاشتو راهیسې يې معاشونه نه دي اخیستي.

د زابل ځايي امنیتي چارواکي هم مني، چې پولیسو او اربکیانو ته يې پر وخت معاشونه نه دي ورکړي.

د زابل امنیه قومندان معراج الدین سادات وايي، دوی ورته د دوو میاشتو معاشونه حواله کړي او د شهر صفا امنیه قومندان ته يې ویلي، چې لار خوشي کړي.

تر دې وړاندې هم د هېواد په ګوټ ګوټ کې پولیسو او د ملي اردو عسکرو د معاشونو د میاشتو میاشتو ځنډ شکایتونه کړي دي، خو دا لومړی ځل دی چې پولیس او اربکیان یو ځای له همدې امله لویه لار تړي.

د شنونکو په باور دولتي ځواکونو ته د چاوراکو کمه توجه د دې علت شوې، چې هغوی جنګي روحیه له لاسه ورکړې او ډلې ډلې طالبانو ته وسلې پر ځمکه ږدي.

نن هم د بادغیس په مقر ولسوالۍ کې د یوې پوستې قومندان له خپلو ۱۵ عسکرو سره یو ځای طالبانو ته تسلیم شوی دی، خو ځايي چارواکو لا هم په دې تړاو څه نه دي ويلي.

د نن ټکی اسیا یوټیوب چېنل
avatar
  ګډون وکړئ  
خبرتیا غوښتل د