نړیوال دې جنګي اخلاق او عاطفه له طالبانو زده کړي

خالد افغان زوی

تیرې څو اونۍ د افغانستان په شمال لویدیځ کې بادغیس ولایت د سختو جګړو ډګر و، طالبانو د دې ولایت مهمه ولسوالي ( بالامرغاب) چې په حلقوي سړک پرته او له ترکمنستان سره پوله لري، د مرکز په شمول له عسکرو ونیوله. په دې جګړو کې سلګونه عسکر هم طالبانو ژوندي ونیول او یو شمیر عسکر چې د تيښتې لارې یې طالبانو نیولې وې ترکمنستان ته وتښتیدل او د تورغونډۍ پر لاره راستانه شول.

په داسې حال کې چې د هیواد په لراوبر کې د موسم په تودیدو سره د جګړې ډګر هم تود شوی، د کابل حکومت د خالد په نوم عملیات او طالبانو د الفتح په نوم عملیات اعلان کړ ي دي. بل اړخ ته امریکایي او داخلي عسکرو تر پخوا سختو وحشتونو ته لاس اچولی، هره شپه بمبارونه،چاپې، وژل، نیول او لوټماري جریان لري چې په هلمند کې له کورونو څخه د ښځو د تښتونې واقعه دغه حالت نور هم تریخ او بوږنوونکی کړ. خو د جګړې په همدې توده مرحله کې همدا نن د اپریل په ۱۳ مه طالبانو په بادغیس ولایت کې ۱۲۸ تنه هغه عسکر خوشي کړل چې څو ورځې وړاندې یې د جګړې په تاوده میدان کې نیولي وو.

د نیول شویو بندیانو خوشي کول کومه نوې خبره نه ده، اما دا به شاید په تاریخ کې ډیر لږ پیښ شوي وي چې د جګړې په تاوده ډګر کې نیول شوي سلګونه عسکر له دوه درې ورځې زندان وروسته پرته له جزاء ورکولو، محاکمې او حتی د نقدي مرستې په ورکړې سره احسانا خوشي شوي وي.

معمولا امریکایان او د کابل حکومت هم بندیان ازادوي، خو داسې مهال چې یو وار په کلونو کلونو د بګرام او پلچرخي محبسونه ورباندې تېر، په مزمنو ناروغیو یې مبتلاء او د رګونو وینه ور وچه کړي. داسې تر اوسه نه دي لیدل شوي چې امریکایانو او د اخلي عسکرو د جګړې په ډګر کې وسله په لاس نیول شوي طالبان دوه درې ورځې بعد خوشي کړي او د کرایې په ورکولو سره یې دخپلو کورونو په خوا لیږلي وي.

د طالبانو لخوا د ۱۲۸ تنه تازه نیول شویو عسکرو احسانا خوشي کولو دا خبره ثابته کړه چې طالبان هغسې نه دي لکه څنګه یې چې نړیوالې رسنۍ تعریفوي. هغوی د اسلام عالي اخلاقو ته ژمن  او د رحم، عاطفې او بشردوستۍ له صفاتو برخمن دي.

دوه نیمې لسیزې وشوې چې نړیوالو رسنیو او د غرب  تبلیغاتي دستګاوو څرخی اچولی چې طالبان دهشت ګر دي، قاتلان دي، بې رحمه دي، بې ګناه خلک وژني، د چا د سر او مال پروا نلري، د ښځو او ماشومانو حقوق پایمالوي او دغسې نور سل او زر تورونه د طالبانو په اړه تبلیغوي. مګر نن چې طالبان د جګړې په ډګر کې نیول شوي مسلح عسکر دومره ژر، په دومره اکرام او احسان سره خوشي کوي، نو ثابتیږي چې د غربي رسنیو تبلیغات هسې د عقدې او حسد خبرې دي چې هیڅ واقعیت نلري.

هغه طالب چې په جګړه کې نیول شوي دښمن باندې دومره رحم او لورېینه لري، نو تاسو قیاس کړئ چې د عامو خلکو، بې دفاع وګړو، ښځو، ماشومانو او ملکي وطنوالو په اړه به څومره له عاطفې او نرمۍ ډک چلند کوي. طالبانو په دې عمل سره وښودله چې هغوی د هر چا په نسبت د انسانانو ژوند ته ډیر احترام لري، هغوی د جنګ اخلاقو ته تر هر چا ډیر تعهد لري. د هغوی بشردوستي او عاطفه یوازې د ژبې پر سر او یا د ژنیو د کنوانسیون په شان په کوم کاغذي سند کې نه ده محصوره،  بلکې طالبان خپل جنګي اخلاق او عاطفه په عمل کې ثابتوي نو ځکه په کار ده چې نړیوال د جنګ اخلاق، عاطفه، د بندیانو حقوق او بشر دوستي باید له طالبانو زده کړي. او متقابلا د طالبانو په نوم نیول شوي هغه بندیان خوشي کړي چې له کلونو کلونو د بګرام او پل چرخي په محبسونو کې بې پوښتنې پراته او کورنۍ یې په بیلتون کې ځوریږي