لويه ربه: عبيدالله علم

عبيدالله علم

سوله غواړو ربه ته وکړه کرم
چې نور تويه نشي وينه په هر دم

يرغلګر زموږ له پاکې خاورې ورک کړه
د قدرت تږي په سمه لار کړه سم

دوی له حاله د ملت کله خبر دي
نه لري کور کې يتيم او نه بل غم

دوی جګړو کې خپلې ګټې خوندي کړي
غورځوي په ولس شپه او ورځې بم

د ظالم بچيان کړه مړه او دوی معيوب کړه
چې شي پوه د مظلومانو په ماتم

زه علم کومه تل د سولې هڅی
دا وېشلی قام مې ټول کړه سره جم