ميدان وردګ؛ د ښځو او ماشومانو په ګډون ۸ تنه په هوايي بريد کې وژل شوي «انځورونه»

نن ټکی اسيا (شنبه، ۳۱ وری، ۱۳۹۸ل): د ميدان وردګ ولايت په نرخ ولسوالۍ کې يو ځل بيا د ولسي وګړو په کورونو چاپو او هوايي بريدونو کې د ښځو او ماشومانو په ګډون ولسي وګړو ته مرګ ژوبله اوښتې.

راپورونه وايي چې د میدان وردګ ولايت د نرخ ولسوالۍ په صدمردي دره کې وړمه شپه چاپه پيل شوې وه چې ۲۴ ساعته يې دوام وکړ او تيره شپه پای ته ورسېده چې په نتيجه کې يې د سيمې د يو تن ديني عالم او بل ولسي وګړي کورونه بمبار کړي
دي او د ښځو او ماشومان په ګډون يې اته تنه ولسي وګړي وژلي دي.

له سيمې څخه د ترلاسه شويو معلوماتو له مخې د وړمې شپې په اوږده چاپه کې چې شاوخوا ۲۴ ساعته يې دوام کړی دی تيره شپه دوه بجې پای ته رسېدلې ده چې د سيمې د يو ديني عالم او د جومات ملاامام (مولوي عبدالواحد) او د خان محمد په نامه د يو بل ولسي وګړي کورونه په کې په بشپړه توګه ويجاړ شوي دي.

د خان محمد په نامه د سيمې د اوسېدونکي په کور هوايي بريد کې نوموړی خپله، د هغه ورور او د هغه د کور درې ماشومان او درې مېرمنې وژل شوي دي او دوه نورې ميرمنې ټپيانې دي.

له سيمې څخه يوې سرچينې نن ټکي اسيا ته ويلي دي چې د سيمې خلکو د مړو جسدونه له ځان سره اخيستي دي او د ولايت مقام ته د اعتراض په توګه روان دي.

د يادونې وړ ده چې تيره شپه د ننګرهار ولايت په خوږياڼو ولسوالۍ کې هم د ولسي وګړو په کورونو هوايي بريدونو کې ولسي وګړي په نښه شوي دي چې نن يې په جنازو هم د خوږياڼو ولسوالۍ له مرکز څخه توغنديز بريدونه شوي دي.

دا په داسې حال کې ده چې تيره شپه د غزني ولايت په ګيلان ولسوالۍ کې هم د ګډو ځواکونو له لوري د ولسي وګړو په کوورنو هوايي بريدونو او چاپو کې ګڼو ولسي وګړو ته ځاني او مالي زيان اوښتی دی.

د نن ټکی اسیا موبایل اپلیکیشن
avatar
  ګډون وکړئ  
خبرتیا غوښتل د