د نن ټکی اسیا موبایل اپلیکیشن

پاکستان ته په پرلپسې درې ماتو؛ انګلستان سیریز وګاټه

نشرونکی: حماد افغان برخه: ورزش مې 18, 2019

نن ټکی اسیا (شنبه، ۲۸ غویي، ۱۳۹۸ل): د پاکستان او انګلستان کرېکټ لوبډلو ترمنځ په څلورمه سیالۍ کې یو وار بیا پاکستان لوبډلې د «۳۴۱» منډو هدف دفاع ونشوه کړای او د ۳ ویکټو په توپیر یې ماتې وخوړه.

انګلستان لوبډلې د تېر په څېر یو وار بیا ثابته کړه چې په خپله خاوره د تر ټولو ستر هدف پوره کولو وړتیا لري، انګلستان لوبډله د ناتینګم ښار په لوبغالي کې چې دغه سیالۍ په کې ترسره شوه د زیاتو نړیوالو یو ورځنیو منډو ریکارډ لري.

له دې وړاندې په دغه «ټرینټ برج» لوبغالي کې انګلستان لوبډلې د ۲۰۱۸م کال په جون میاشت کې استرالیا لوبډلې ته د «۴۸۱» منډو ستر هدف ټاکلی و، همدا ډول یې پر پاکستان لوبډلې هم په همدغه لوبغالي کې په ۲۰۱۶م کال کې «۴۴۴» منډې جوړې کړې وې.

د دواړو لوبډلو ترمنځ د پنځه یو ورځني سیریز په لړ کې څلورمه سیالۍ هم په پرلپسې ډول انګلستان لوبډلې وګټله او یاد سیریز یې په خپل نوم کړ.

په دغه سیالۍ کې پاکستان لوبډلې لومړی توپوهنه وکړه چې د بابر اعظم په زړه پورې سلیزې او د فخر زمان او محمد حفیظ نیمه سلیزو په مرسته یې انګلستان ته په ټاکلو ۵۰ اورونو کې «۳۴۱» منډې هدف وټاکه.

په ځواب کې د انګلستان لخوا جیسن روی یو وار بیا په زړه لوبه نندارې ته وړاندې کړه او سلیزه یې ووهله، د نوموړي په زړه پورې لوبې او د بین سټوکس په وروستۍ کې چټکو ۷۱ منډو هدف په وروستي اور کې د ۳ ویکټو په توپیر بشپړ کړ.

د راپورونو له مخې؛ د انګلستان لوبډلې اوپنر توپوهونکي جيسن روی په داسې حال کې سليزه ووهله چې له دې وړاندې شپه يې په روغتون کې د ناروغې لور سره په ويښه تېره کړې وه، د مبصرينو لخوا د نوموړي دغه سليزه په «احساساتي سليزه» ونومول شوه.

د پاکستان او انګلستان لوبډلو پنځمه یو ورځنۍ سیالۍ به د یکشنبې په ورځ په ۱۹مه نېټه په لیډز لوبغالي کې ترسره شي، له دې وړاندې لومړۍ یو ورځنۍ سیالۍ د ورښت له کبله بې پایلې اعلان شوې وه او ورپسې درې پرلپسې سیالۍ انګلستان ګټلي دي.

ټیګونه:

د نن ټکی اسیا یوټیوب چېنل
avatar
  ګډون وکړئ  
خبرتیا غوښتل د