معترضین: له قطر دفتر څخه د بهرنیو ډيپلوماټانو لیدنې طالبانو ته «مشروعیت» ورکوي

قطر، د طالبانو سیاسي دفتر ودانۍ

نن ټکی اسیا (چهار شنبه، ۱جوزا،  ۱۳۹۸ل): د سیاسي چارو یو شمېر شنونکو، د طالبانو له مرستیال مشر «ملا عبدالغني برادر» سره د بهرنیو لوړپوړو ډيپلوماټانو لیدنې غندلې او دا ګام یې طالبانو ته د مشروعیت ورکولو په معنی بللی.

کابل مېشتي د سیاسي چارو کارپوه «فضل الرحمن اوریا» په دې تړاو طلوع نیوز ته وویل « له ملا برادر سره د اروپایي اتحادیې د استازي لیدنه طالبانو ته مشروعیت ورکوي او له دې ګام څخه پوهېدلای شو چې هغوی طالبان د افغانستان د راتلونکي حکومت په حیث منلي».

اوریا زیاته کړه « له همدې امله دي چې امریکایان له طالبانو څخه د راتلونکي افغانستان په اړه ضمانت غواړي».

د سیاسي چارو یو بل کار پوه «نجیب ازاد» بیا د افغان سولې مذاکرات له «بن بست» سره مخ شوي بولي او په وینا یې، ددې بن بست او لیدنو لامل دادی چې نړیوال د سولې په تړاو اجماع ته نه دي رسېدلي.

بل  لوري ته یو شمېر کارپوهان بیا د طالب او بهرنیو ډيپلوماټانو تر منځ لیدنو ته هیلمن دي او په وینا یې، دا ډول لیدنې د افغان سولې په پروسه مثبت اغېز شیندلای شي.

د نجات لارې شورا مشر «سید اکبر اغا» هم په ورته اند دی د نوموړي په وینا، اروپايي اتحادیه کولای شي د افغان سولې په برخه کې ګټور رول ولوبوي.

د اکبر اغا په خبره، دا ځل که د جرمني مشورې په نظر کې ونیول شي، کیدای شي هغوی هم د افغان سولې په پروسه کې رول لوبولو ته چمتو شي.

په ورته وخت کې، د سیاسي چارو یو شمېر کارپوهان داسې مهال له ملا برادر اخند سره د بهرنیو ډيپلوماټانو لیدنو ته اندېښمن دی، چې یوازې په تېره یوه میاشت کې د جرمني ځانګړي استازي «مارکس پوتزیل»، د اروپايي اتحادیې استازي «رونالډ کوبیا»، د ملګرو ملتونو ځانګړي استازي او د اندونیزیا د بهرنیو چارو وزیرې له نوموړي سره لیدلي او هغه ته یې ډاډ ورکړی چې، د افغان سولې په برخه کې به مثبت رول لوبوي.

تبصرې (1)

  • له نړیوالو ډیپلوماتانو سره د طالبان د سیاسی دفترهر ډول سیاسی اړیکی راته د منلو وړ دی او په دی برخه کی چی هر څومره لیده کاته وشی مثبت یی ارزوم او طالبانو ته می وړاندیز هم داده چی په سیاسی برخه کی چی څومره فعال کیدای شی هغومره دی فعال شی لکن یوه هیله می ورڅخه داده چی نوردی جنګ بس کړی، که رښتیا په افغان ولس، خپلو جنګیالو او خپلو هغو ملګرو چی په کلونوکلون دزندان د تورو تمبو شاته پراته دی دردیږی نو جګړه دی بس کړی او دخپلو ملګرو دنجات او خلاصون او په افغانستان کی دنورو وینو د توئیدو دمخینوی لپاره دی کاروکړی، تاسی راشی دلته وګورۍ هره ورځ بی شمیره بی ګناه انسانان په شهادت رسیږی، دکلیو او بانډو ښځی، ماشومان ، لویان او سپین ږیری د راکټونو او هوانونو له مرمیو لاندی ژوند کوی.