انګلستان د نړيوال جام پېل په بريا وکړ

نن ټکی اسيا (جمعه، ۹ غبرګولی، ۱۳۹۸ل): د کرېکټ نړيوال جام لومړۍ سيالۍ کې انګلستان لوبډلې سويلي افريقا لوبډلې ته د «۱۰۴» منډو په توپير ماتې ورکړه او د ياد جام لومړۍ بريا يې ثبت کړه.

د انګلستان او سويلي افريقا ترمنځ په دغه سيالۍ کې سويلي افريقا پچه وګټله خو د توپ اچونې پريکړه يې وکړه چې ناکامه ثابت شوه.

انګلستان لوبډلې د جيسن روی، جويي روټ، ايون مورګن او بين سټوکس په نيمه سليزو سويلي افريقا لوبډلې ته په ټاکلو «۵۰» اورونو کې «۳۱۲» منډې هدف وټاکه.

په ځواب کې د سولي افريقا پېل انديښمنونکی و چې په لومړي سر کې يې دوه ويکټې له لاسه ورکړې او هاشم امله د ټپي کېدو له کبله کښیناست، په دې سره د سويلي افريقا ټول لوبغاړي په ۴۰م اور کې د «۲۰۷» منډو په جوړولو وسوځېدل.

لکه څرنګه چې انګلستان لوبډله د ياد جام ګټلو لپاره تر ټولو غوره لوبډله ګڼل کيږي همدا ډول يې پېل هم په بريا وکړ.

د ننۍ لوبې غوره لوبغاړی بين سټوکس شو، نوموړي په توپوهنه کې ۸۹ منډې جوړې کړې، په توپ اچونه کې يې دوه ويکټې واخيستې او په ډګر ساتنه کې يې په زړه پورې ريکارډي کيچ ونيوه.

Catches win matches! 👏

But which of these three outstanding grabs will you vote for to win the first @Nissan Play of the Day of #CWC19?

VOTE ➡️ https://t.co/7SsrSjNv2c pic.twitter.com/aDnYkYRyCO

— ICC (@ICC) May 30, 2019

د يادونې ده چې د نړيوال جام په دويمه ورځ به د پاکستان او ويسټ انډيز لوبډلې سبا د جمعې په ورځ د ماسپښين په دوه بجې د انګلستان ناتنګهم په ټرينټ برج لوبغالي کې مخامخ کيږي.