د اولاد په روزنه کې د مور او کورنۍ ونډه

محمد يعقوب نائل

څرګنده ده چې د معاشرې په جوړولو او خرابولو كې چې څنګه سړي رول لري، دغه راز مېرمنې او کورنۍ يې هم شاملې دي، د ماشوم تر زېږېدو وروسته چې ده ته کومه تربيه ورکول کيږي د هغې سره سم ماشوم درس اخلي، كه ماشوم د يهوديت، نصرانيت يا مجوسيت په ماحول کې لوی شي؛ نو ماشوم د هغوی رنګ اخلي.

كه ددې په مقابل کې په ديني، اخلاقي او فطري ماحول کې لوی شي؛ نو اسلامي نښي او اثرات يې په ژوند كې څرګنديږي، همدا وجه ده چې د مور او پلار دواړو ذمه واري ده چې د کوچنيانو ښه روزنه وکړي، بلكې زه خو وايم چې د ماشوم د ژوند په پيل کې د هغه د تربيې زياته ذمه واري د پلار په نسبت د مور ده، ځكه چې پلار په عادي ډول د كور څخه بېرون ژوند تېروي، مور هر وخت په كور كې وي، دغه وجه ده چې د کوچنيانو اړيکې د مور سره د پلار په نسبت زياتې وي.

هم دا وجه ده چې د مور غېږ ته د اولاد لومړنی ټولګۍ ويل شوی دی او دا يو منل شوی حقيقت دی چې «العلم في الصغر كالنقش علی الحجر» (د کوچينوالي لوست داسې دی لكه په ډبري باندې چې نخشه جوړه شي).

ددې وجې له وړوکتوب څخه د دوی د ښه روزنې فکر پکار دی، بايد مور خپله د صحيح عقيدې، پاكو اخلاقو او ديني زده کړو څخه برخمنه وي، د الله او د رسول الله محبت يې په زړه کې ځای نيولی وي؛ په دې طريقه به يې بچيان هم ښه زده کړې وکړي، ددې وجې ديني ښودنه په نارينه او ښځينه ټولو باندې لازمه ده.

دغه راز د دين د زده کونكو لپاره چې كوم فضيلتونه په قران او حديث كې راغلي هغه د سړو او ښځو دواړو لپاره يو شان بيان شوي دي، الله پاك فرمايي: يَرْفَعِ اللَّهُ الَّذِينَ آمَنُوا مِنْكُمْ وَالَّذِينَ أُوتُوا الْعِلْمَ دَرَجَاتٍ (سورة المجادلة).

ژباړه: الله پاك به په تاسو کې د هغه چا درجې لوړې کړي چې ايمان يې راوړی دی او هغه کسانو ته چې علم ورکول شوی دی (د هغوی لپاره لوړي) درجې دي.

څنګه چې سړي د شرعي حكمونو مكلف دي، دغه راز ښځې هم مكلفې ده.

د رسول الله د بيبيانو د ډېروالي يوه وجه دا هم وه چې د دوی په ذريعه مسلمانانو مېرمنو ته اسلام په پوره ډول ورسول شي، دغو پاکو بيبيانو دا دنده په ښه ډول سر ته ورسول.

په دې وروستي دور كې يو خوا ډول – ډول اخلاقي بدی پيدا كيږي، بې پردګۍ، د سړو او ښځو ګډوډي، په جامو او چال چلن كې د ښځو او سړو د يو بل سره څرنګوالی څرګندول، فېشن پرستي، د يو بل سره د انځور ويستنې مينه او داسې نور جرمونه چې پايله يې د اخلاقو په خرابېدو تماميږي.

دا او دې ته ورته ډېری داسې بدی شته چې د يوې مسلمانې خور، مور او لور په صفت بايد ځانونه ترې وژغوري، څو د دوی بچي وکولای شي دوی ته په کتو ښه ژوند او ښه تربيه واخلي.

د ماشومانو د ښه تربيې په هيله

د نن ټکی اسیا یوټیوب چېنل
avatar
  ګډون وکړئ  
خبرتیا غوښتل د