طالبان: د زابل ولایت «دایچوپان» ولسوالۍ مو نیولې

نن ټکی اسیا (سه شنبه ، ۲۱غبرګولی، ۱۳۹۸ل): طالبان وايي، د زابل ولایت دایچوپان ولسوالۍ یې تر پرلپسې حملو وروسته نیولې او دولتي ځواکونو ته یې درنه مرګ ژوبله اړولې.

د طالبانو ویاند «‌ذبیح الله مجاهد» په خپل ټویټر لیکلي « د الفتح عملیاتو په دښمن ځپونکي جریان کې تیره شپه د زابل ولایت دایچوپان ولسوالۍ مرکز، ورته نیږدې د عسکرو قرارګاه او امنیتي پوسته په ټولیزه توګه فتحه شول، په یادو عملیاتو کې د دښمن لسګونه عسکر وژل شوي چې د ۱۲ عسکرو جسدونه په سیمه کې پراته دي».

اعلامیه وړاندې زیاتوي « همد راز د دښمن ۱ هاموې ټانک او ۲ رینجر موټر له منځه یوړل شول، ۱ ټانک او خورا ډيره سپکه او درنه وسله، مهمات او نظامي لوازم تر لاسه شول».

د طالب ویاند له قوله په یاده نښته کې ۲ طالب جنګیالي وژل شوي او ۳ نور ټپيان دي.

بل لور ته د کورنیو چارو وزارت د طالبانو دا  څرګندونې  ناسمي بولي او ادعا کوي چې، په دایچوپان ولسوالۍ باندې شوې حمله یې په شا تمبولې او د دایچوپان لپاره د طالبانو د نومول شوي ولسوال په ګډون یې ګڼ شمېر طالبان وژلي.

له کورنیو چارو وزارت څخه خپره شوې اعلامیه د دایچوپان ولسوالۍ د ولسوال په ګډون د ۴۴ طالبانو د وژنې او د حملې د شاته تمبولو خبر له ځانه سره لري.

یاده دې وي چې، زابل د افغانستان له هغو ولایتونو څخه دی چې ورځ تر بلې د طالبانو د واک ساحه پکې پراخېږي، څه موده وړاندې ددې ولایت ولایتي شورا اندېښنه ښودلې وه چې که د طالبانو بریدونه همداسې دوام وکړي لرې نه ده چې د بشپړ زابل د سقوط خبرونه واورو.

بل لور ته د دایچوپان ولسوالۍ د سقوط خبرونه داسې مهال مخته راځي چې، یوازې یوه ورځ وړاندې د ګد حکومت د ملي امنیت شورا سلاکار «حمدالله محب» ګواښ وکړ چې، طالبان به په څلورو میاشتو کې دننه له منځه وړي.