افغانستان – پاکستان د اړیکو په بیا رغونې توافق وکړه

نن ټکی اسیا (جمعه، ۷چنګاښ ۱۳۹۸ل): پاکستان ته د ولسمشر غني دوه ورځېني سفر پر مهال افغانستان او پاکستان د خرابو اړیکو په بیا رغونې توافق وکړه.

ولسمشر غني پاکستان ته په داسې حال کې سفر کوي چې امریکا له طالبانو سره سبا د خبرو اترو لپاره یو ځل بیا کیني.
د ولسمشر غني سفر موخه د پاکستان سره دوه اړخیزو سیاسي، تجارتي، اقتصادي او امنیتي برخو کې د همکاریو د پیاوړي کولو لپاره شوې دی.

د ارګ څخه خپره شوې خبرپاڼه وايي چې د ولسمشر غني او د پاکستان لومړي وزیر عمران خان تر منځ ملاقات کې کې دواړو لوریو په دې ټینګار وکړ چې له تېرو تېروتنو څخه په زده کړه باید تېروتنې بیا تکرار نشي او د دواړو هیوادونو ترمنځ د ښو اړیکو، مناسباتو، همکاریو او راتلونکي لپاره دې ګډ کار وشي.

خپرپاڼې زیاته کړې چې ولسمشرغني څرګنده کړه چې، د سیمه ییزه همکاریو او اتصال د فکر او لیدلوري او په دې برخه کې د افغانستان د موقعیت او هلو ځلو له امله منځنۍ اسیا او جنوبي اسیا د سوداګرۍ، ټرانزیټ او راکړو ورکړو له پلوه یو له بل سره د نښلېد په حال کې دي.

هغه وویل، چې د افغانستان او پاکستان ګډه کاري کمېټه به د سیمه ییزه همکاریو او اتصال په برخه کې د پاکستان فعال رول او ګډون هم وهڅوي.

په دغه کتنه کې دواړو مشرانو د افغانستان او پاکستان ترمنځ د دوه اړخیزه اړیکو او همکاریو، د سیمې د ثبات، امنیت او اقتصادي ودې، د بې وزلۍ ضد مبارزې او د دواړو هیوادونو ملي خپلواکۍ ته د متقابل درناوي لرلو په اړه بحث او خبرې کړي دي.

ولسمشرغني همدا راز وویل چې د سولې مشورتي لویې جرګې د استازو د اجماع او غوښتنې په اساس له پاکستان سره د نورمالو اړیکو د ایجاد په موخه یې دغه هیواد ته سفر وکړ او هیله ده چې دا سفر به د دواړو هیوادونو د اړیکو او همکاریو لپاره نوی باب پرانیزي.

ولسشر غني د خپل رسمي سفر په جریان کې د پاکستان د بېلابېلو سیاسي ګوندونو مشرانو او استازو بلاول بوټو زرداري، شهباز شریف، افتاب احمدخان شېرپاو، محمودخان اڅکزي، سراج الحق او مولانا فضل الرحمن سره جلا جلا وکتل.

د نن ټکی اسیا یوټیوب چېنل
avatar
  ګډون وکړئ  
خبرتیا غوښتل د