د بارودو سیلۍ!! ثاقب خپلواک

ثاقب خپلواک

دلته غم دلته دردونه ، دلته شور دی د سلګېو
دلته څړیکې، پرهرونه ، دلته ځوږ دی د زګیروېو

وې پر ګونجې مخ یې ماتې مرغلرې اوښکې باندې
د شهېد ځوی جنازې ته وړې سوېو اسویلېو

وو د ورور پر جنازه یې ، د بنګړو تخم کرلی
چې پر قبر یې ګلان شنه دي د خُور له شنو بنګړېو

غمو وړې کونډه ناوې یه و سر ته وه ولاړه
جنتي وینه یې تله له پرهرونو د مرمېو

د شهید ګودر چنار لاندې به شور ؤ د پېغلوټو
د بارودو سېلۍ لوټ کړ ،دلته حُسن د غوټېو

له ټپو یې د ننګ مینه اوریده د غزا ډول ته
هڅول جنګ ته زلمي به زموږ پېغلو ملالېو

د مېرڅي د بدرنګۍ راج چې یې رام کړلو ثاقبه!!
دا هېواد د میړنېو ، د اتلو سپین پګړېو

ثاقب خپلواک