اربکيانو په لوګر کې ولسي خلکو ته مرګ ژوبله اړولې

نن ټکی اسیا (سه شنبه، ۲۵چنګاښ ۱۳۹۸ل): د لوګر ولايت محمد اغې ولسوالۍ زرغون ښار کلي اوسېدونکي وايي، ځايي اربکيانو تېره شپه د کار سعيد سيمه کې د ملکي خلکو پر کورونو برید کړی، د ښځو او ماشومانو په ګډون يې دولس کسانو ته مرګ ژوبله اړولې ده.

د اربکيانو په بريد د يوه وژل شوي ماشوم ماما عبدالحکيم نن ټکی اسیا ته وويل، له تېرې اوږدې مودې د سيمې اربکيان له کليوالو سره ناوړه چلند کوي، په زوره ترې ډوډۍ او باج غواړي او تېره ورځ، چې د سيمې خلکو د اربکيانو د ظلمونو پر خلاف مظاهره وکړه، د کار سعيد سيمې اربکيانو د خلکو پر کورونو بریدونه وکړل، چې له امله يې دوه کسان وژل شوي  او لس نور ټپيان دي.

د سيمې پارېدلو خلکو په دغه پېښه کې د وژل شوو کسانو جسدونه د کابل-

پکتيا لويې لارې ته راويستي او دغه لاره يې د ترافيکو پر مخ تړلې ده.

د سيمې خلک وايي، تر هغو به دغه لاره تړلي وي، تر څو د بې دفاع ملکي وګړو قاتلين نه وي نيول شوي.

د يادونې وړ ده، چې زرغون ښار د محمد اغې ولسوالۍ هغه سیمه ده، چې ډېره برخه يې د طالبانو په واک کې ده، خو  په ځينو برخو کې  يې اربکيان واکمن دي او خلک يې له ناوړه چلنده شکايتونه کوي.

د نن ټکی اسیا یوټیوب چېنل
avatar
  ګډون وکړئ  
خبرتیا غوښتل د