عمران خان په امریکا کې: د افغانستان کړکېچ د جګړې له لارې نه حل کېږي

نن ټکی اسیا (دوشنبه، ۳۱چنګاښ ۱۳۹۸ل):  د پاکستان لومړی وزیر « عمران خان» چې دا مهال په درې ورځني رسمي سفر امریکا ته تللی، په خپلو څرګندونو کې ټینګار کړی چې د افغانستان کړکېچ هیڅ نظامي حل نه لري.

خان چې په واشنګټن کې یې د پاکستاني الاصله امریکایانو یوې سترې غونډې ته خبرې کولې،  وویل « هغه څه چې ما ویل زه ورباندې اوس هم یقین لرم، د افغانستان کړکېچ هیڅ نظامي حل نه لري، زه له لومړۍ ورځې له همدې امله غندل شوی یم ؛ خو او س ټوله نړۍ پوهېږم چې د افغانستان ستونزه د جګړې له لارې نه حل کېږي».

عمران خان دا څرګندونې له ډونالډ ټرمپ سره تر نننۍ پلان شوې لیدنې څو ساعته وړاندې کړې، د عمران خان او ټرمپ په لیدنه چې د چارواکو له قوله د سیمې او نړۍ په امنیتي مسایلو بحث پکې کېږي، د افغانستان موضوع پکې اساسي ځاي لري.

د رسنیو د راپورونو په اساس ټرمپ به په خپله لیدنه کې له عمران خان وغواړي څو طالبان دایمي اوربند ته وهڅوي.