د اندونیزیا، پاکستان او افغانستان دیني علماء درې اړخیزه غونډه کوي

نن ټکی اسیا (پنجشنبه، ۳ زمری، ۱۳۹۸ل): د اندونیزیا هیواد د پاکستان او افغانستان دینی علماء خپل هیواد ته وربولي او د افغانستان د روان وضعیت په تړاو د بحثونو ترسره کولو په موخه ناسته ورته برابروي.

د اندونیزیانو په بهرنیو چارو وزارت کې د اسیا او افریقا لپاره د یاد هیواد استازي «دیسرا پارکایا» د ګډ حکومت د ملي امنیت شورا د مرستیال سره په همدې تړاو خبرو کې ویلي « یاده ناسته به په دروانې میلادی میاشتې په ۲۶ او ۲۷ نېټه د اندونیزیا په پلازمېنه جاکارتا کې کېدونکې ده».

پارکایا همدا راز له ګډ حکومت وغوښتل څو یادې ناستې ته علماء ور وپېژني.

د پارکایا په خبره، دوی ددې تر څنګ پلان لري څو په نږدې راتلونکې د افغان ښځو لپاره هم یوه غونډه راوبولي.

د ملي امنیت شورا سلاکار له اندونېزیا هیواد مننه کړې، چې د افغانستان د سولې او ثبات لپاره کار کوي.

نوموړي په اندونیزیا کې د علماوو تېر ځل ناسته مثبته او له لاسته راوړنو ډکه ارزولې او په قول يې، دا ډول ناستې عامه پوهاوي، سولې او تفاهم ته لاره پرانېزي.

د شنونکو په خبره، داسې مهال چې طالبانو د کابل حکومت په وړاندې جګړه تونده کړې او ورځ تر بلې د هغوی تر واک لاندې سیمې رالاندې کوي، حکومت له دې لارې غواړي په طالبانو د مذهبي فشار واردولو هڅه وکړي.