کورنیو چارو وزارت: د امنیتي سرتېرو د ازادېدو په تړاو د طالبانو ادعا حقیقت نه لري

نن ټکی اسیا (دوشنبه، ۲۱ زمری، ۱۳۹۸ل): د ګډ حکومت د کورنیو چارو وزارت وایي، د طالبانو له لوري د «۷۶» تنو امنیتي سرتېرو د ازادېدو ادعا یو تبلیغاتي اعلان وو او هیڅ حقیقت نه لري.

د کورنیو چارو وزارت له لوري په همدې تړاو خپره شوې خبرپاڼه کې راغلي « د کورنیو چارو وزارت د معلوماتو له مخې چې له بېلابېلو ولایتونو څخه یې راټول کړي، ښيي چې تر دې دمه د امنیتی سرتېرو له ډلې هیڅ یو تن هم نه دی ازاد شوی».

خبرپاڼه زیاتوي « په تېرو څو ورځو کې هیڅ امنیتي سرتېری د طالبانو له بنده خلاص شوی نه دی، د امنیتي سرتېرو د خلاصون ادعا بېځایه او یوازې تبلیغاتي اړخ  لري، که چېرې طالبان رښتیا هم د امنیتي سرتېرو د خلاصولو نیت لري باید د هغوی لست نشر کړي او په دې توګه د افغانستان خلګو ته خپله ادعا ثابته کړي».

د کورنیو چارو وزارت وروسته له هغه د طالبانو له لوري د بندیانو د خلاصون ادعا ردوي، چې د روانې اسد میاشتې په ۱۹ نېټه طالبانو د یوې اعلامیې له لارې خبر ورکړ، د خپل مشر په امر یې ۷۶ تنه دولتي عسکر چې په بېلابېلو وختونو کې د جګړې په مهال نیول شوي وو؛ ازاد کړي.

د طالبانو د اعلامیې له مخې، خلاص کړل شویو عسکرو ته یې د لارې کرایه او نوې جامې  هم ورکړي.

76 prisoners were released in various provinces of the country on the occasion of #EidAlAdha in accordance with the decree of #AmirUlMumineen https://t.co/3bulJsv32O

— Zabihullah (..ذبـــــیح الله م ) (@Zabehulah_M33) August 10, 2019

د طالبانو دا ګام په ټولنیزو رسنیو کې په پراخه کچه وستایل شو او له حکومت هم وغوښتل شول؛ څو د طالب بندیانو په خلاصولو سره سولې ته ښه نیت څرګند کړي.