نړۍ

سعودي: د تېلو پر سترو زيرمو د حوثيانو د بریدونو له امله اور لګېدلی «ويډيو»

نن ټکی اسیا (شنبه، ۲۳ وږی، ۱۳۹۸ل): سعودي عربستان کې د تېلو پر دوو سترو زېرمو د حوثي ملېشو بې پيلوټه بریدونو له امله پراخ اورونه لګېدلي دي.

د سعودي رسنيو په وينا د تېلو د دولتي شرکت «ارامکو» پر دوو زېرمو بې پيلوټه برید کې سخت اورونه لګېدلي وو، چې له څو ساعته هڅو وروسته اور ووژل شو.

سعودي چارواکو د پېښې پخلی کړی، خو دا يې نه دي ويلي، چې د دې پېښې تر شا د چا لاس دی.

په يمن کې حوثي ملېشو د دې برید مسؤوليت منلی دی.

د حوثيانو له لوري رسنيو ته په لېږل شوې خبرپاڼه کې راغلي، چې دوی د سعودي په ختيځ کې د بقيق او خریص تېلو پر زېرمو لس ډرون بریدونه کړي او خبرداری يې ورکړی دی، چې سعودي کې به د خپلو بریدونو دايره نوره هم پراخه کړي.

د تېلو «بقیق» زېرمه د سعودي په ختيځ ظهران ښار څخه شپېته کيلومټره په جنوب لويديځ کې ده او د «خريص» زېرمه د سعودي په لويديځ کې ده، چې دواړه زېرمې د نړۍ په کچه تر ټولو سترې زېرمې بلل کيږي.

د يادونې وړ ده، چې د يمن جګړه په ۲۰۱۴ کال کې پيل شوې او په ۲۰۱۵ کال کې د سعودي عربستان په مشرۍ ايتلاف د يمن پلازمېنې صنعا په شمول په نورو سيمو کې هم د حوثيانو پر ضد هوايي بمبار او ځمکني عمليات پيل کړل.

په جګړو او بمباريو کې تر اوسه د ښځو او ماشومانو په شمول له لس زرو زیات کسان وژل شوي او شاوخوا څوارلس ميليونه يمنيان له لوږې او قحطۍ سره  مخ دي، خو د جګړې د پای ته رسېدو څرک تر اوسه هم نه ښکاري.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x