ارګ: د بهرنیو هیوادونو له لوري د طالبانو مېلمه پالنه د اصولو خلاف ګام دی

ټکی اسیا (سه شنبه، ۲۷ وږی، ۱۳۹۸ل): وروسته له هغه چې له قطر دفتر څخه یو طالب پلاوی تر روسیې وروسته اېران هیواد ته په سفر ولاړ او تر څنګ یې سیمه ییزو هیوادونو ته د ورته سفرونو د غځېدلو خبرونه خپاره شول؛ ارګ یې په غبرګون کې ویلي، د بهرنیو هیوادونو له لوري د طالبانو مېلمه پالنه د هیوادونو تر منځ د اړیکو د اصولو خلاف ګام دی.

د ارګ ویاند «صدیق صدیقي» چې په کابل کې يې یوې ناستې ته خبرې کولې، وویل «  طالبان د سیمې او نړۍ لپاره یو جدي ګواښ دی او د بهرنیو هیوادونو له لوري هغوی ته بلنه ورکول او یا د هغوی مېلمه پالنه کول د هیوادونو تر منځ د اړیکو د اصولو خلاف ګام دی او د افغانستان حکومت ته چې همېشه د ګاونډیانو سره ښې اړیکي غواړي؛ هیڅ د منلو وړ نه دی».

صدیقي زیاته کړه « طالبان تشدد او  افغان وژنې ته ادامه ورکوي او په عین وخت کې په ډېر ویاړ ددې ډول بریدونو مسئولیت اخلي. جنګ، جګړه او تشدد د هغوی شعار دی».

یاده  دي وي، چې ارګ داسې مهال سیمه ییزو هیوادونو ته د طالبانو سفرونو وراخطا کړی، چې د شنونکو په باور، طالبان د بریالۍ ډيپلوماسي په مټ توانېدلي، له نړیوالو هیوادونو سره خپلې اړیکې غښتلې کړي او په دې توګه ځان د یوه پیاوړي نظامي ځواک تر څنګ د یوه سیاسي ځواک په حیث هم مطرح کړي.