حنیف اتمر: په ټاکنو کې له هيڅ نوماند ملاتړ نه کوو

نن ټکی اسیا (سه شنبه، ۲ تله، ۱۳۹۸ل): د ګډ حکومت د ملي امنیت شورا پخوانی سلاکار وايي، په راتلونکو ټاکنو کې بې طرفه پاتې کېږي او له هیڅ مشخص نوماند ملاتړ نه کوي.

د حنیف اتمر له مطبوعاتي دفتر څخه په همدې تړاو په خپره شوې خبرپاڼه کې نا امني، تقلب او غیر مناسب شرایط له راتلونکو ټاکنو څخه د تېرېدو لاملونه بلل شوي ، چې په خبره یې له امله یې شفافې او رڼې ټاکنې ترسره کېدای نه شي.

خبرپاڼه وړاندې زیاتوي « څو ځله مې وړاندیز وکړ، چې د ټاکنو پروسه دې د یو څه وخت لپاره وځنډول شي تر څو سولې ته د رسېدو لپاره یوه اجماع جوړه او د ملي مصلحتونو په نظر کې نیولو سره سولې ته ورسېږو؛ خو زما دا وړاندیز ونه منل شو».

د اتمر په قول، پورته لاملونه ته په کتو یې پرېکړه کړې، چې په راتلونکو ټاکنو کې نه خپله برخه اخلي او نه هم د کوم بل نوماند ملاتړ کوي.

حنیف اتمر څه موده وړاندې د «سولې او اعتدال» تر نامه لاندې له یوه ټاکنیز ټیم سره د ټاکنیزو سیالیو ډګر ته راووت او یونس قانوني او محمد محقق یې د خپلو مرستیالانو په توګه اعلان کړل؛ خو څه موده وروسته یې ټیم د اختلافونو ښکار شو او پلویانو یې نورو ټاکنیزو ټیمونو ته مخه کړه.

محمد محقق له عبدالله عبدالله سره ودرېد او د یونس قانوني په اړه داسې اوازې تر غوږو کېږي، چې له دولت جوړوونکي ټیم سره یو ځای کېږي.