يوناما: طالبان باید پر ټاکنيزو مرکزونو او رايې کاروونکو بریدونه ونه کړي

نن ټکی اسیا (پنجشنبه، ۴ تله، ۱۳۹۸ل): په افغانستان کې د ملګرو ملتونو د سرمنشي ځانګړي استازي او د «يوناما» مشر تاداماچي يماماموتو له طالبانو غوښتي، چې پر ټاکنيزو مرکزونو او رايې کاروونکو خلکو له بریدونو ډډه وکړي.

تاداماچي ياماموتو وړمه ورځ «سه شنبه» د قطر پلازمېنې دوحه د طالبانو د سياسي دفتر له استازو سره له ليدو وروسته دا څرګندونې کړي دي.

تاداماچي ياماموتو وايي، که هر څوک پر ټاکنيزو مرکزونو او خلکو بریدونه وکړي، کېدای شي دا جنګي جنايت وګڼل شي او طالبان بايد له دا ډول بریدونو ډډه وکړي.

طالبانو په تېرو څو ورځو کې دوه ځله له عامو خلکو غوښتي، چې په ټاکنيزو کمپاينونو او رايې اچونې کې له ګډونه ډډه وکړي او خبرداری يې ورکړی، چې ټاکنيز مرکزونه د دوی د بریدونو هدف دي.

خو طالبانو د ملګرو ملتونو د ځانګړي استازي د ورستيو څرګندونو په اړه تر اوسه څه نه دي ويلي.

د چارو کارپوهان وايي، د افغانستان پنځوس سلنه خاوره د طالبانو په واک کې ده، هلته ټاکنې ناشونې دي، په پنځه ويشت سلنه خاوره کې د تاوتريخوالي او جګړو له امله ټاکنې له ګواښ سره مخ دي او يوازې په پنځه ويشت سلنه خاوره کې ټاکنې شوې دي، خو دا ډول ټاکنې به مشروعيت ونه لري.

اوس، چې ټاکنو ته يوازې درې ورځې پاتې دي، په افغانستان کې د امریکا سفارت هم د ټاکنو په روڼوالي او امنيت اندېښنه ښکاره کړې او وايي، که وضعيت همداسې وي، د امنيتي ګواښونو سربېره د ټاکنو پایلې منل به هم ستونزمن وي او کېدای شي ډېر نوماندان يې ونه مني.