ځانګړي راپورونه

ټاکنو کې د ولس ګډون ولې کمرنګه او پيکه و؟

نن ټکی اسیا (یکشنبه، ۷ تله، ۱۳۹۸ل): تېره ورځ په هېواد کې د امریکايانو د راتګ راهيسې په تېرو اتلسو کلونو کې د څلورم ځل لپاره ولسمشريزې ټاکنې په داسې حال کې ترسره شوې، چې د خلکو ګډون په کې کمرنګه و.

د پلازمېنې کابل په شمول په سترو ښارونو کې د رايې اچونې مرکزونو کې د رايې ورکوونکو کتارونه نه و او د لرې پرتو سيمو وضعيت تر دې هم بدتر و.

د ټاکنو کميسيون ويلي و، شاوخوا نهه ميليونه خلک د رايې ورکولو لپاره په شرایطو برابر دي، د ملګرو ملتونو او نړيوالو بنسټونو څارونکو ډلو ويلي، په ټاکنو کې ۲ ميليونه خلکو ګډون کړی دی، خو ځينې نورې حکومتي سرچينې وايي، د رايې اچوونکو شمېر ۱.۲ ميليونه دي.

د پخوا په پرتله دا ځل د ټاکنو په پروسه کې د خلکو لېوالتيا هم د نشت برابر وه او د ناامنو سيمو سربېره په کابل ښار، باميانو غوندې خوندي ولايت کې د خلکو ګډون د نشت برابر و.

د پخواني ولسمشر حامد کرزي د واکمنۍ پر مهال د اطلاعاتو و کلتور وزير او د کرزي د دفتر رئیس عبدالکريم خرم وايي، د خلکو د پيکه ګډون لامل اساسي علت پر دغې پروسې د خلکو نه باور و.

د کابل پوهنتون استاد او د مسير ورځپاڼې مسؤول مدير اسد وحيدي وايي، د ۱.۲ ميليونه خلکو په رايو د ۳۶ ميليونه خلکو ولسمشري مشروعيت نه لري.

د چارو کارپوه او مدني فعال خیرالله شينواري ويلي، په لسګونو ولسواليو کې د امنيتي ګواښونو له امله ټاکنې نه دي شوي او په ښاري سيمو کې هم د خلکو ګډون کمرنګه و.

ازادي راډيو هم په خپلو راپورونو کې ويلي، د رايې اچونې په ورځ اته سوه مرکزونه تړل شوي وو.

د چارو کارپوه او پوهنتون استاد ذاکر جلالي په خپله فيسبوک پاڼه ليکلي، د ولس سياسي شعور لوړی شوی او د ټاکنو پر ځای يې سولې ته رايې ورکړه.

طالبانو هم له ټاکنو وړاندې په خپلو تکراري اعلاميو کې له خلکو غوښتي وو، چې د ټاکنو مرکزونه او کارکوونکي د دوی د بریدونو هدف دي او خلک بايد له دې پروسې لرې وګرځي.

طالبانو دا ټاکنې جعلي، د جګړې د دوام او د سولې د له منځه وړلو لامل بللې وې.

داسې ښکاري، چې ولس په روانو حالاتو کې سوله تر ټاکنو غوره بولي، د ټاکنو پروسه يې د هېواد په ګټه نه ده بللې، له همدې امله يې د ناامنو سيمو سربېره د باميانو په څېر خوندي سيمو کې هم په ټاکنو کې ګډون نه دی کړی او د ۱.۲ ميليونه وګړو ګډون به هېڅکله د ولسمشر د ټاکلو مشروعيت ونه شي لرلی.

ورته لیکنې

ګډون وکړئ
خبرتیا غوښتل د
guest
1 Comment
زړو
نویو ډیرو خوښو شویو
Inline Feedbacks
ټولې تبصرې کتل
اجمل

معلومه خبره ده، لدی وجی کم رنګه وه چی طالبانو هر چیری خلکو ته ویلی وو چی انتخاباتو کی ګډون ونکړی. د طالب د اخطارونو له وجی دا پروسه کم رنګه وه.

Back to top button
1
0
Would love your thoughts, please comment.x
()
x