نړۍ

د سعودي سپيناوی: ایران ته مو پيغام نه دی لېږلی

نن ټکی اسیا(چهارشنبه، ۱۰تله، ۱۳۹۸ل): د سعودي عربستان د بهرنيو چارو وزير عادل الجبیر ويلي، چې هېواد يې د ایران ولسمشر ته هېڅ پيغام نه دی لېږلی او په دې اړه د تهران د حکومت ادعا بې بنسټه بولي.

عادل الجبیر تېره شپه د ایران په اړه په خپلو ټويټر پيغامونو کې د ایراني چارواکو ادعاوې رد کړي دي.

نوموړي زياته کړې: «ځينو دوستو هېوادونو د روان تاوتريخوالي پر مهال له سعودي د زغم غوښتنه کړې وه او سعودي هم روښانه کړې وه، چې په سيمه کې امنيت او ثبات غواړي.»

د ایراني حکومت وياند علي ربيعي ويلي و، سعودي د نړۍ د يو شمېر مشرانو په واسطه د ولسمشر حسن روحاني په نوم د سولې پيغام رالېږلی دی.

ربيعي زياته کړې وه، که سعودي په خپل دريځ کې بدلون راولي، نو ایران يې هرکلی کوي.

د ایران او سعودي ترمنځ لفظي ناندرۍ په داسې حال کې روانې دي، چې د تېره سپټمبر په څوارلسمه سعودي کې د تېلو پر دوو سترو چاڼځايونو ډرون بریدونه شوي وو، چې له امله يې د سعودي د تېلو پنځوس سلنه صادرات کم شوي دي.

امریکا او سعودي د دې بریدونو پړه پر ایران اچولې، خو ایران دا تورونه رد کړي دي.

عادل الجبیر په خپله ټويټرپاڼه کې ويلي، سعودي خپلو دوستو هېوادونو ته ويلي، د تاوتريخوالي د کمولو وړانديز هم بايد د هغه هېواد له لوري وشي، چې د خپلو کارونو او بریدونو له لارې په سيمه کې تاوتريخوالي ته لمن وهي.

د سعودي د بهرنيو چارو وزير زياته کړې، چې د ایران په اړه يې نه يوازې خپلو دوستو هېوادونو ته خبر ورکړی، بلکې د ملګرو ملتونو کلنۍ غونډه کې يې هم په دې اړه خپل دريځ روښانه کړی دی.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x