د دوو والیانو په شمول د طالبانو ۱۱ مهم مشران خوشي شوي

نن ټکی اسیا (یکشنبه، ۱۵ تله، ۱۳۹۸ل): کونړ لپاره د طالبانو پخوانی والي شيخ عبدالرحيم او د نیمرزو د والي مولوي عبدالرشيد بلوڅ سربېره يوولس مهم طالبان او قومندانان نن د بګرام له زندانه ازاد شوي دي.

شيخ عبدالرحيم څو کاله کونړ لپاره د طالبانو والي او په ختيځ کې پر نفوذه شخصيت و، دوه کاله مخکې په جلال اباد ښار کې نيول شوی و، مولوي عبدالرشيد هم په نیمروز لوړپوړی قومندان او د ياد ولايت لپاره د طالبانو والي و.

ويل کيږي، د يادو دواړو مشرانو سربېره يوولس مهم طالبان د بګرام له زندانه خوشې شوي، خو د نورو خلاص شوو کسانو هويت تر اوسه نه دی معلوم.

ځينو سرچينو ويلي، د بنديانو د خلاصېدو موضوع اسلام اباد کې د امریکايي پلاوي او طالبانو د استازو له ليدو وروسته پيدا شوې، خو د نن ټکی اسيا د معلوماتو پر اساس د بنديانو د خلاصون موضوع نوې نه ده، بلکې د امریکا او طالبانو نهه پړاوه مذاکراتو کې د بنديانو موضوع هم په مکرره توګه ياده شوې او که په اسلام اباد کې يو ځل بيا دا خبره ياده شوي وي، نو دا به د سولې درېدلو خبرو د بيا پيليدو لپاره يو نوی پرمختګ وي.

د امریکا او طالبانو تر منځ د بندیانو تبادله نوې موضوع نه ده، په دې اړه د مذاکراتو په نهه پړاوونو کې پریکړي او مذاکرات سوي دي، ځکه نو، که په اسلام اباد کې د بندیانو خبره سوي وی او بندیان تبادله سي، دا به په مړو!؟ مذاکراتو کې د شوي پرمختګ یو عملي اړخ وي. 😉#AfghanPeaceProcess

— nunn.asia (@nunnasia) October 6, 2019

دا بنديان په داسې حال کې خوشې شوي، چې تر دې مخکې هم ويل شوي وو، امریکا به ځينې مهم طالب بنديان خوشې کړي، خو د ګډ حکومت مشر اشرف غني ويلي و، چې د ده له امر پرته يو بندي هم څوک نه شي خوشې کولی.

د ګډ حکومت چارواکو تر اوسه د خوشې شوو طالبانو په اړه څه نه دي ويلي.