يوناما: فراه او نيمروز کې د هوايي برید پر مهال لسګونه ولسي خلک وژل شوي وو

نن ټکی اسیا (چهارشنبه، ۱۷ تله، ۱۳۹۸ل): افغانستان کې د ملګرو ملتونو مرستندويه ادارې «يوناما» او د بشري حقونو سازمان په خپل ګډ راپور کې ويلي، د روان ۲۰۱۹ کال په می مياشت کې امریکايي الوتکو د فراه ولايت بکوا ولسوالۍ او د نيمرزو ولايت په دلارام سرحدي ولسوالۍ کې د ملکيانو کورونه بمبار کړي وو او لسګونو ملکي وګړو ته يې مرګ ژوبله اړولې وه.

په می مياشت کې امريکايي عسکرو او ګډ حکومت ادعا کړې وه، چې بکوا ولسوالۍ کې يې د مخدره موادو ۶۸ کارخونې ويجاړې کړې وې او ۱۵۰ طالبان يې وژلي، خو يوناما او د بشري حقونو سازمان د امریکايي پوځيانو او ګډ حکومت ادعاوې بې بنسټه بللي دي.

د يوناما او بشري حقونو د سازمان په راپور کې راغلي، د سيمې له خلکو  يې پوښتنې کړي او بالاخرې دې پایلې ته رسيدلي، چې سيمه کې د مخدره موادو کارخونې شته، خو د طالبانو ملکيت نه دی او وژل شوي خلک هم ټول ملکيان دي.

د راپور له مخې په وژل شوو کې ځينو خلکو د مخدره موادو په کارخونو کې کارونه کول، خو يو شمېر نورې مېرمنې او ماشومان په خپلو کورونو کې وژل شوي دي.

يوناما او د بشري حقونو سازمان وايي، که دغو خلکو د مخدره موادو په کارخونو کې هم کارکاوو، بايد پر خلاف يې قانوني ګامونه پورته شوي وای، د ژوند خونديتوب مستحق وو او بايد په بمباريو کې نه وای وژل شوي.

د نن ټکی اسیا یوټیوب چېنل
avatar
  ګډون وکړئ  
خبرتیا غوښتل د