ورزش

لا لیګا لیګ: میسي د رونالډو د زیات هیټریک وهلو ریکارډ مساوي کړ

نن ټکی اسیا (یکشنبه، ۱۹ لړم، ۱۳۹۸ل): د برسلونا لوبډلې مشهور ستوري لیونل میسي تېره شپه په اسپانوي فوټبال لیګ «لا لیګا» کې درې ګولونه ووهل چې لوبډلې ته یې په ۴-۱ بریا ورکړه.

۳۲ کلن لیونل میسي وتوانېد په لا لیګا لیګ کې ۳۴ هیټریکونه ووهي، نوموړي په دې سیالۍ کې د رونالډو د زیاتو هیټریکونو وهلو ریکارډ هم مساوي کړ.

د ارجنټاین هېواد نامتو ستوري په دغه سیالۍ کې چې د سلتا ویګو پر وړاندې ترسره شوه، درې ګولونه چې لومړی یې د پينالتي څخه په ۲۱مه دقیقه کې او دوه نور یې په فري کیک سره په ۴۶مه او ۴۹مه دقیقه کې وو ووهل.

تر دې دمه میسي د فوټبال په کیرئر کې ۵۲ هیټریکونه وهلي دي چې ۴۶ یې د برسلونا لوبډلې او ۶ یې د خپل هېواد ارجنټاین لپاره وهلي دي.

که څه هم میسي د فوټبال روانو سیالیو په پېل کې د ټپي کېدو له کبله له یو شمېر سیالیو بهر و خو اوس هم د یاد لیګ دویم زیات ګول وهونکی لوبغاړی دی، نوموړي ۸ ګولونه وهلي خو کریم بینزیما چې ټولې لوبې یې ترسره کړي په ۹ ګولونو لومړی دی.

میسي وتوانېد یو وار بیا لوبډله د جدول سر ته وړاندې کړي، له دې وړاندې ریال مدرید خپلې سیال لوبډلې ایبار ته په ۴-۰ ماتې ورکړې وه چې لومړی مقام یې خپل کړی و خو برسلونا د ګولونو په توپیر بیرته لومړی مقام ونیو.

د یادونې وړ ده چې لیونل میسي له تېرو ۱۶ کلونو راهیسې د برسلونا لوبډلې په ګټه لوبیږي، چې په لړ کې یې لومړی هیټریک د ریال مدرید لوبډلې پر وړاندې په ۲۰۰۷م کال کې وهلی و.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x