طالبان: داعش موږ مات کړ، حکومت پناه ورکړه

نن ټکی اسیا (سه شنبه، ۲۸ لړم، ۱۳۹۸ل): طالبان وايي، حکومت له داعش ډلې سره مستقیمه همکاري کوله او د هغوی په ماتولو کې یې هیڅ رول نه درلود.

د طالبانو له رسمي ادرس څخه په خپره شوې خبرپاڼه کې راغلي، چې ښایي د ګډ حکومت مشر «اشرف غني» ننګرهار ته د خپل سفر په لړ کې د داعش ډلې د ماتولو ادعا وکړي، چې د طالبانو له قوله هیڅ د منلو وړ نه ده.

خبرپاڼه وړاندې لیکي « د ننګرهار د داعش په ماتې کې د کابل ادارې یو فیصد رول هم نه درلود.د ننګرهار میړنی اولس د دې قضې شاهد دی.داعش ته ماتې د اسلامي امارت د مجاهدینو شهکار و چې د الله په نصرت او د ملت په مرسته ترسره شو.»

د خبرپاڼې له مخې، د حکومت او داعش ډلې تر منځ همکاري ددې سبب شوه، چې عملیات اوږده شي او طالبانو ته مشکلات جوړ شي «په پای کې د داعش هغو غړو ته چې د اسلامي امارت مجاهدینو په وروستیو ځالو کې محاصره کړي وو، د کابل ادارې لخوا نجات ورکړل شو، چې له داعش سره د هغوی د ښکاره همکاری او خواخوږي بیلګه ده.»

۲/۱ ــ دکابل ادارې مشر اشرف غني جلال اباد ته تللی، ممکن هلته د داعش دماتې په اړه کاذبې ادعاوې وکړي.
دننګرهار د داعش په ماتې کې دکابل ادارې یو فیصد رول هم نه درلود.
دننګرهار میړنی اولس ددې قضې شاهد دی.
داعش ته ماتې داسلامي امارت شهکار و چې دالله په نصرت او دملت په مرسته ترسره شو.

— Zabihullah (..ذبـــــیح الله م ) (@Zabehulah_M33) November 19, 2019

داعش ډله، چې په ننګرهار ولایت کې یې پیاوړی حضور درلود، کابو یوه اوونۍ وړاندې یې طالبانو د ټغر د ټولېدو خبر ورکړ، چې ورسره جوخت د ګډ حکومت مشر هم دداعش ماته د خپلو امنیتي ځواکونو بریا وبلله او هغوی ته یې د یوه پیغام له لاري مبارکي وویله.

یاده دې وي، چې په افغانستان کې دداعش شته ډلې ته د ګډ حکومت او امریکا د یوې پروژې په سترګه کتل کېږي او د پخواني ولسمشر «حامد کرزي» په ګډون ګڼ شمېر چارواکو په بیا، بیا اعتراف کړی، چې امریکایان او ګډ حکومت غواړي داعش ډله د طالبانو په مقابل کې تقویه کړي.