غني: ټرمپ ډاډ راکړی، چې سوله به له افغان حکومت سره په همغږۍ پرمخ وړل کېږي

نن ټکی اسیا (دوشنبه، ۴ لیندۍ، ۱۳۹۸ل):  د ګډ حکومت مشر «اشرف غني» وایي، د افغان حکومت له مالکیت پرته سوله راتلای نشي او ټرمپ ورته ډاډ ورکړی، چې حکومت به د سولې په پروسه کې همغږی کوي.

غني، چې د امریکا د کانګرس له پلاوو سره یې په ارګ کې خبرې کولي، وویل « پایداره سولې ته د رسېدو لپاره باید دغه پروسه د افغان حکومت په مالکیت او رهبرۍ ترسره شي او موږ د هغې د تحقق لپاره د سولې اوه ماده یي طرحه ترتیب کړې چې په هغه کې عمده ګامونه د کورنۍ اجماع نویوالی، په کورنۍ کچه دوامداره مشورې، په سیمه ییزه، اسلامۍ نړۍ او بین المللي کچه خبرې شاملې دي.»

نوموړي زیاته کړې « ولسمشر ټرمپ ډاډ راکړی، چې د سولې پروسې په اړه د فعالیتونو څرنګوالی به له افغان دولت سره په مشوره او همغږۍ پرمخ وړل کېږي.»

نوموړي ددې تر څنګ د کانګرس غړو ته ډاډ ورکړی، چې افغان امنیتي ځواکونه غښتلي شوي او کولای شي امنیت ټینګ کړي.

غني داسې مها ل د سولې د بریا لپاره د افغان حکومت مالکیت شرط بولي، چې شنونکي وایي، حکومتي چارواکي د سولې په تړاو یوه خوله نه دي او ډېر وخت ددې  دنظرونو تنوع او له یو بل سره مخالفت د سولې په پروسه کې ځنډ او خنډ رامنځته کوي.