افغانان: اشرف غني د «غازي»  مډال  د افغانانو «قاتل» ته ورکړی

نن ټکی اسیا (چهار شنبه، ۶ لیندۍ، ۱۳۹۸ل): وروسته له هغه، چې د ګډ حکومت مشر «اشرف غني» د غوڅ ملاتړ د ماموریت مرستیال قوماندان ته د افغانانو د ویاړلي شخصیت «میر مسجدي خان» مډال ورکړ؛ په ټولنیزو رسنیو باندې دې کار ګڼ منفي غبرګونونه راوپارول.

سیاسي فعال او د کابل پوهنتون استاد «فیض محمد ځلاند» دې کار ته په غبرګون کې په خپله فسبوک پاڼه لیکلي « افسوس! نن د میر مسجدي خان مډال مپکر د ډرون بمبار، شپنیزو عملیاتو او د افغان وژنې د مخکښ جنرال په سینه و ټومبه، نن که میرمسجدي خان ژوندی و، نو همدې جنرال به د ستر ترهګر نوم ورته اخیست.»

نوموړي زیاته کړې « مپکر او ارګمیشتي ټامیان او سلاکاران یې د افغان میړني تاریخ څخه ناخبره دي، کنه کله به یې هم داسې شرموونکی کار نه و ترسره کړی.»

د نور احمدي په نامه یوه بل تن لیکلي « نور یی هم تشویق کړه چی موږ باندی دبمونو مور هم وآزمویی.»

د وکیل احمد ذاکر په نوم یو بل تن لیکلي «ورکړه ورکړه نورمیډالونه هم ورکړه داپاته اولس هم په تباه کړه/هسی هم ستادحکومتولي په دوره کي موتراولس وژنی تیره بل څه ونه لیدل.»

د عبدالخالق دراني په نوم یو بل فعال لیکلي «اى تا مولا غرق که ددې لپاره مډال ورکوې چې ملت يې درته ښه په اخلاص وژلى دى چې خياطان به اوس دې ته کوم پرتوګ ګنډي.»

یاده دې وي،  دا لومړی ځل نه دی، چې د افغانانو ویاړلو شخصیتونو ته منسوب مډالونه داسې چاته ورکول کېږي، چې لاسونه یې د افغانانو په وینو سره دي، تر دې وړاندې هم په بیا، بیا کابل حکومت بهرني چارواکي په همدې ډول تشویق او هڅولي.