سرور دانش: حکومت د فساد ضد هڅو کې ناکام دی

نن ټکی اسیا (دوشنبه، ۱۸ لیندۍ، ۱۳۹۸ل): د ګډ حکومت د ولسمشر دوهم مرستيال سرور دانش منلې، چې د دوی حکومت د فساد ضد هڅو کې ناکامو او اعلان شوي اهداف يې نه دي ترلاسه کړي.

نوموړي په کابل کې د فساد ضد نړيوالې ورځ نمانځغونډې ته د وينا پر مهال وويل، حکومت هڅه کړې، چې د فساد پر ضد بریا تر لاسه کړي، خو پایلو ته په کتو بايد ومنل شي، چې حکومت په دې اړه له ناکامۍ سره دی.

افغانستان لپاره د امريکايي مرستو د شفافيت څارونکې ادارې «سیګار» او همدارنګه په افغانستان کې د ملګرو ملتونو سياسي استازولۍ دفتر «يوناما» هم ويلي، حکومت د فساد د له منځه وړلو لپاره هڅې کړي، خو په خپلو هڅو کې پاتې راغلی دی.

د څارونکو په وينا حکومت د کاغذ پر مخ د فساد ضد يادونه کوي، خو په عملي توګه داسې څه نه ښکاري، چې حکومت دې په خپله ادعا کې بريالی وي.

څارونکي بنسټونه وايي، حکومت يوازې د هغو فسادګرو پر خلاف دوسيې رسمي کوي، چې پراخ لاسونه نه لري او کمزوري وي او کوم فساد کوونکي، چې لوړپوړو چارواکو سره اړيکې لري او يا هم د کوم بانډ غړي وي، هېڅوک يې پر وړاندې د درېدو هڅه نه کوي.