بغلان: طالبانو يوه پوسته سقوط کړې او ۷ عسکر ورسره يو ځای شوي

نن ټکی اسیا (سه شنبه، ۱۵ سلواغه، ۱۳۹۸ل): د بغلان ولايت په مرکزي بغلان ولسوالۍ کې طالبانو د دولتي ځواکونو يوه پوسته سقوط کړې او په پلخمري ښار کې ورسره اووه دولتي عسکر يوځای شوي دي.

#الفتح:
مهم: تیره شپه د بغلان ولایت پلخمري ښار دوهمې حوزې اړوند چشمه شیر سیمه کې دکابل مزار به عمومي لاره د مزدورو عسکرو قرارګاه فتحه شوه.
دښمن د تلفاتو په لیدلو سره تښتیدلی، وسله او مهمات یې نیول شوي.
مجاهدینو ته زیان نه دی رسیدلی. pic.twitter.com/Hr9yhKLB0p

— Zabihullah (..ذبـــــیح الله م ) (@Zabehulah_M33) February 4, 2020

د طالبانو وياند ذبيح الله مجاهد وايي چې طالبانو د مرکز پلخمري ښار د دوهمې حوزې اړوند چشمه شير سيمه کې د کابل- مزار شريف په لويه لاره د دولتي ځواکونو قرارګاه سقوط کړې ده او ګڼ شمېر وسلې او مهمات يې نيولي دي.

همدا راز د يو بل خبر له مخې د مرکزي بغلان ولسوالۍ په مربوطاتو کې هم اووه تنه دولتي عسکر له خپلو دندو لاس په سر شوي دي او طالبانو ته ورغلي دي.

#الفتح:
تیره ورځ د بغلان ولایت مرکزي بغلان ولسوالۍ مربوطاتو کې دکابل ادارې ۷ تنه عسکر اوپولیس دحقائقو په درک کولو سره له خپلودندولاس په سر او مجاهدینو ته راغلل.
د جلب و جذب مسئولینو د آرام ژوند ډاډ ورکړ.
د راغلو نومان: طاهر، رامین،زین الله، الله ګل، رحمت الله،نجیب او عیسی خان. pic.twitter.com/XsmYJhnKO0

— Zabihullah (..ذبـــــیح الله م ) (@Zabehulah_M33) February 4, 2020

طالب وياند تسليم شوي عسکر طاهر، رامین،زین الله، الله ګل، رحمت الله،نجیب او عیسی خان ياد کړي دي او ويلي يې دي چې يادو عسکرو ته د طالبانو د جلب او جذب کميسيون ولايتي مسؤلينو هرکلی ووايه او هغوی يې خپل عادي ژوند ته سوق کړل.

تر اوسه د بغلان ولايتي چارواکو په دې اړه څه نه دي ويلي.

دا په داسې حال کې ده چې په دې ورستيو کې د دولتي ځواکونو له ليکو ګڼ شمير عسکر جلا کيږي او له طالبانو سره يوځای کيږي.

تيره ورځ هم د بدخشان ولايت راغستان ولسوالۍ کې اووه پوليس له طالبانو سره يو ځای شوي وو.