د کابل کندهار پر لویه لاره ترافیکي پېښې اته تنو ته مرګ ژوبله اړولې

نن ټکی اسیا (شنبه، ۱۹ سلواغه، ۱۳۹۸ل): د کابل کندهار پر لویه لار د غزني ولایت په حدودو کې د یوې ترافیکې پېښې له امله اته تنو ته مرګ ژوبله اوښتې.

د غزني ولایت له مطبوعاتي دفتر څخه په خپره شوې خبرپاڼه کې راغلي، چې پېښه نن سهار د غزني ولایت د زنخان ولسوالۍ په حدودو کې د یوه ۳۰۴ او مازدا موټر د ټکر په پایله کې رامنځته شوې.

په خبرپاڼه کې وړاندې راغلي، چې په پېښه کې اووه تنه ټپيان شوي او یو بل وژل شوی.

ویل کېږي، پېښه له ترافیکي قوانینو د سرغړونې او بې احتیاطۍ له امله رامنځته شوې.

یاده دې وي، چې د لویو لارو خرابوالی، د ترانسپورتي شرکتونو تر منځ ناسالم رقابت او د ترافیکي قوانینو نه مراعات کول هغه څه دي، چې هره میاشت یې له امله لسګونه هیوادوال قرباني کېږي.