د اشرف غني دوهم مرستيال اسلام اباد ته تللی

نن ټکی اسیا (یکشنبه، ۲۷ سلواغه، ۱۳۹۸ل): د ګډ حکومت د مشر اشرف غني دوهم مرستيال سرور دانش د کډوالو په اړه جوړېدونکي دوه ورځني کنفرانس کې د ګډون لپاره اسلام اباد ته رسېدلی دی.

د سرور دانش له مطبوعاتي دفتره په خپره شوې اعلاميه کې راغلي، د بهرنيو چارو وزارت سرپرست هارون چخانسوري او د کډوالو چارو وزير سيد حسين عالمي بلخي هم له ښاغلي دانش سره په دې سفر کې ملګري دي.

د ملګرو ملتونو سرمنشي انټونيو ګوټريس هم نن سهار د کډوالو په اړه نړيوال کنفرانس کې د ګډون لپاره پاکستان ته تللی دی.

پاکستاني چارواکي وايي، په دغه هېواد کې د افغان کډوالو د اوسېدو څلور لسيزو پوره کېدو په مناسبت يو نړیوال کنفرانس راغوښتی دی.

ټاکل شوې، چې په دغه کنفرانس کې د افغان کډوالو د ستونزو او چلینجونو په اړه خبرې وشي.