افغانستان

طالبانو او امريکا د توافقنامې د لاسلیک نېټه اعلان کړه

نن ټکی اسیا (جمعه، ۲ کب ۱۳۹۸): د امریکا د بهرنیو چارو وزیر «مایک پمپیو» وایي، له طالبانو سره د تشدد د کموالي په برخه کې توافق ته رسېدلي او د دواړو لورو تر منځ به د سولې توافقنامه د روانې میاشتې په نهه ویشتمه نېټه لاسلیک شي.

د امریکا له بهرنیو چارو وزارت څخه په همدې تړاو خپره شوې خبرپاڼه کاږي، چې د امریکا متحده ایالات له اوږدې مودې راهیسې په افغانستان کې د جګړې د پای ته رسولو، د خپلو او متحدینو د عسکرو د شمېر راکمولو او په افغان خاوره کې د بهرنیو ترورستي ډلو د فعالیت د مخې نیولو لپاره د سیاسي حل لټولو په موخه له طالبانو سره په خبرو بوخت دي.

خبرپاڼه وړاندې کاږي « موږ له خپل مذاکراتي ټيم او په افغانستان کې د ملي وحدت له حکومت سره  تر سلا مشورو وروسته له طالبانو سره د تشدد د هر اړخیز کموالي په برخه کې یوه توافق ته رسېدلي يو، که چېرې دا کار په بریالي توګه ترسره شي، د سولې د هغې توافقنامې لاسلیک ته به ور وړاندې شو، چې د روانې فبروري میاشتې په نهه ویشتمه نېټه یې د امضاء تمه ده.»

د خبرپاڼې په بنسټ، د توافقنامې له لاسلیک وروسته به بین الافغاني مذاکرات پیل کېږي، تر څو د افغانستان د راتلونکي سیاسي چوکاټ په اړه پکې خبرې وشوې او یوه تلپاتې اوربند ته لاره هواره شي.

د امریکا د بهرنیو چارو وزارت د افغانستان سوله یوازې هغه وخت شونې بللې، چې ددوی په خبره افغانان سره مخامخ خبرې وکړې.

امریکا ددې تر څنګ له طالبانو سره توافق ته رسېدل د سولې یو فرصت بللی، له افغانانو یې غوښتي، څو له دې فرصت ګټه واخلي او تر څنګ یې د قطر په ګډون له ټولو هغو لورو مننه کړې، چې ددوی په خبره، د سولې په پروسه کې یې هڅې کړې.

بل لور ته طالبانو هم د یوې خبرپاڼې په بنسټ سره د امریکا له لوري د توافقنامي د لاسلیک اعلان شوې نېټه تایید کړه او  په خبره یې، اوس به دواړه لوري د لاسلیک لپاره د فضاء د جوړلو هڅه کوي او دې مراسمو ته به یو شمېر نړیوال سازمانونه او د ځینو هیوادونو استازي دعوتوي.

د طالبانو په خبره « د بندیانو د خلاصون لپاره به لازم ترتیبات نیسي، د هیواد له بېلابېلو جهتونو سره به د بین الافغاني مذاکراتو زمینه مساعدوي او بالآخره به د ټولو بهرنیو ځواکونو په وتلو او د افغانستان خاوره د چا د امنیت په خلاف نه کارولو سره به په ټول هیواد کې د سرتاسري سولې لپاره لار هواروي، تر څو ټول هیوادوال د امن په فضاء کې د اسلامي نظام تر سیوري لاندې سوکاله ژوند ولري.»

امریکا او طالبان چې له مذاکراتو یې نږدې یو نیم کال تېرېږي، تر سختو او پېچلو خبرو وروسته دې ځای ته رسېدلي.

د طالبانو د سیاسي دفتر مرستیال «عبدالسلام حنفي» له نن ټکی اسیا سره په خپله مرکه کې ویلي وو، چې که له امریکا سره توافق لاسلیک شي، ورسره یو ځای به د بهرنیو عسکرو د وتلو بهیر پیلېږي او د بین الافغاني مذاکراتو پروسه به شروع کېږي.

د حنفي په خبره، له توافق سره هم مهاله او تر بین الافغاني مذاکراتو وړاندې به پنځه زره طالب بندیان ازادېږي او په غبرګون کې به یې طالبان زر تنه د مقابل اړخ بندیان ازادوي.

په ورته وخت کې د طالبانو او امریکا تر منځ د توافقنامې د لاسلیک نېټه په داسې حال کې وروستۍ کېږي، چې په هیواد کې د ټاکنو د پایلو اعلان سیاسي فضاء کړکېچنه کړې او ځینو ټاکنیزو ډلو د موازي حکومتم د جوړولو اعلان کړی.

ټاګونه

ورته لیکنې

ګډون وکړئ
خبرتیا غوښتل د
guest
1 Comment
زړو
نویو ډیرو خوښو شویو
Inline Feedbacks
ټولې تبصرې کتل
اجمل

اوس یی منم چی امضا کیږی ځکه چی امریکایانو ویلی خو کچیری شاهین یی بیا هم وویی چی تر آخر د میاشتی به امضا شی نه یی منم. ماته سوال دا دی چی د توافقنامی سره به سوله راشی، کار او باز به پیدا شی، هوسا ژوند به د افغانانو پر نصیب شی او یا به یو نوی پړاو د جنګ پرانیزل شی؟

د طالبانو حکومت خو مونږه ولید الله د هیڅ کله هغسی حکومت بیا نراولی، د لوږی تندی، بیوزلی او در په دری حکومت. الله د وکړی چی طالبان سړی شوی وی او دنیا والو سره سیالی وکړی.

Back to top button
1
0
Would love your thoughts, please comment.x
()
x
Close
Close