دیني، سیرت او تاریخټولنیزه برخه

د کرونا وايرس د دفعې دعاګانې

عبدالمالک همت

لکه چي خبر يو نن د کب د مياشتي پر ۵مه په هرات کي د کرونا یا کوویډ ۱۹ وايرس لومړۍ پېښه تایید سوه او له همدې امله په دغه ولایت کې بېړنی حالت اعلان سوی دی.

له بده مرغه موږ افغانان چي له يوې بلا لا ژغورل سوي نه يو بله را باندي ها کړي. په دې ورځو کي به موږ د اورکم او سولي او خپلواکۍ بياګټلو خوشالۍ کولای، خو د دوو حکومتونو او نورو ډېرو رنګارنګ خطرناکو بلاوو سر بېره دادی د کرونا د وايرس وژونکې وبا هم را ګډه سوه. په داسي حال کي چي که د لوی څښتن سبحانه فضل او رحم نه وي، د دې واکمنو روغتيا يې ادارې او دا زياتره تش په نامه ډاکټران يې هيڅ مخه نه سي نيولای، بلکي ان په ساده تشخيص يې لا سم نه پوهيږي. نه د دې په چټکتيا سره ساري او وبايي ناروغۍ د دفعي بشپړ سامان آلات او وسايل په واک کي لري، نه د دغو وسايلو په سم کارولو پوهيږي او نه بشپړ روغتيايي پر سونل لري او نه يې تر اوسه بشپړ او کافي قرنطين ځايونه ورته جوړ کړي دي، حتی تر اوسه يې د دې ناروغۍ په اړه دا ساده تبليغات لا د لاسه نه دي سوي.

نو په دې صورتحال کي به هغه چا ته مراجعه کوو او ځانونه به پر سپارو چي هم يې پيدا کړي يو او هم مو پنا کوي. تر هر څه دمخه له ګناهونو څخه د توبې ايستل، ټول بدکارونه او ګناهونه پرېښوول او د دغه لوی څښتن عبادت کول او د هغه کلام لوستل او عمل په کول – چي له دې ټولو بخولو څخه ژغورونکي وسايل دي – پر موږ لازم باله سي.

تر دې راوروسته به هغه دعاوي کوو او هغه وقايوي روغتيا يي تدابير به په کار اچوو او د اړتيا پر مهال به درمل په کار اچوو او استعمالوو چي رسول الله صلی الله عليه وسلم، علمای کرامو رحمة الله عليهم او روغتيا پوهانو يې موږ ته په دغسي حالاتو کي سپارښتنه کړې ده. د اوس لپاره به زه له دغو دعاوو څخه ځيني درته وليکم، نور به له دې ټولو انساني او آسماني بلاوو څخه ساتنه او ژغورنه د پاک الله جل جلاله څخه غواړو او پر هغه جلت عظمته به توکل کوو.

حضرت عثمان بن عفان رضي الله عنه د رَسُولُ اللَّهِ صَلَّى اللَّهُ عَلَيْهِ وَسَلَّمَ حديث داسي روايت کړی دی: « مَا مِنْ عَبْدٍ يَقُولُ فِي صَبَاحِ كُلِّ يَوْمٍ وَمَسَاءِ كُلِّ لَيْلَةٍ: بِسْمِ اللَّهِ الَّذِي لَا يَضُرُّ مَعَ اسْمِهِ شَيْءٌ فِي الأَرْضِ وَلَا فِي السَّمَاءِ، وَهُوَ السَّمِيعُ العَلِيمُ ثَلَاثَ مَرَّاتٍ، فَيَضُرَّهُ شَيْءٌ » دغه حديث ترمذي په ۳۳۸۸ شمېره، أبو داود په 5088 شمېره او امام بخاري په الأدب المفرد کي په 660 شمېره روايت کړی دی او نامتو محدث حاکم صحيح الإسناد بللی دی او د احاديثو اوسمهالي نامتو کره کوونکي علامه الباني په صحيح الأدب المفرد کي صحيح بللی دی.

ژباړه: داسي بنده نسته چي د هري ورځي په سهار او د هري ورځي په ماښام درې ، درې واره دغه دعا ووايي او بيادي کوم شی ضرر ور ورسوي:

بِسْمِ اللَّهِ الَّذِي لَا يَضُرُّ مَعَ اسْمِهِ شَيْءٌ فِي الأَرْضِ وَلَا فِي السَّمَاءِ، وَهُوَ السَّمِيعُ العَلِيمُ.

له ابوهريره رضي الله عنه څخه روايت دی چي يو سړی پیغمبر صلی الله عليه وسلم ته ورغی او ورته ويې ويل: ای د لوی څښتن پیغمبره ! زه تېره شپه لړم وخوړلم . رسول الله صلی الله عليه وسلم ورته وفرمايل: که دي ماښام دغه دعا ويلې وای هيڅ ضرر به يې نه وای در رسولی:

أَعُوذُ بِكَلِمَاتِ اللَّهِ التَّامَّاتِ مِنْ شَرِّ مَا خَلَقَ. دغه حديث امام مسلم په کتاب الدعوات، باب التعوذ من سوء القضاء کي په ۶۷۷۴ / ۲۷۰۹ شمېره تخريج کړی دی.

معاذ بن عبدالله له خپل پلار څخه روايت کوي چي پلار يې وويل: په يوه باراني او تياره شپه رسول الله صلی الله عليه وسلم ته ورغلو چي لمونځ راکړي، نو کله چي ورغلو ماته يې وويل: ماښام او سهار درې، درې واره قُلْ هُوَ اللَّهُ أَحَدٌ او مُعَوِّذَتَيْنِ، يعني: قُلْ أَعُوذُ بِرَبِّ الْفَلَقِ او قُلْ أَعُوذُ بِرَبِّ النَّاسِ (هره سوره ترپايه)وايه د هر څه له ضرره به درته کافي وي. ددغه حديث متن په سنن ابو داود کي په ۵۰۸۲ شمېره تخريج سوی دی.

له حضرت انس رضي الله عنه څخه روايت دی چي نبي صلی الله عليه وسلم به ويل:

«اللَّهُمَّ إِنِّي أَعُوذُ بِكَ مِنَ البَرَصِ، وَالْجُنُونِ، وَالْجُذَامِ، وَمِنْ سَيِّئِ الْأَسْقَامِ» دغه حديث أبو داود په ۱۵۵۴ شمېره، ابن حبان په ۱۰۱۷ شمېره او امام احمد په 13004شمېره روايت کړی او حديث پوهانو صحيح بللی دی.

پورتنۍ دعا سعودي داعي او د مکي حرم پخواني امام عادل الكلباني له کرونا څخه د وقايې لپاره غوره بللې ده.
لاندي دعا که څه هم په کوم حديث کي نه ده راغلې، خو کلمات يې ټول ښه او شرعي دي او تاسي کولای سئ دا هم د دعا په توګه وواياست:

تحصنت بذي العزه والجبروت واعتصمت برب الملكوت وتوكلت على الحي الذي لا يموت اللهم اصرف عنا هذا الوباء وقنا شر الداء ونجنا من الطعن والطاعون والبلاء بلطفك يالطيف ياخبير انك على كل شي قدير.

په بله مقاله کي به که خدای جل جلاله کول د کرونا په وړاندي د لازمو تدابيرو، د ځينو توکو د خوړلو او اسلامي، کورني طبابت په اړه څه درته وليکم والله المستعان، وعليه التكلان.

ټاګونه

ورته لیکنې

ګډون وکړئ
خبرتیا غوښتل د
guest
4 Comments
زړو
نویو ډیرو خوښو شویو
Inline Feedbacks
ټولې تبصرې کتل
سيد زرغون شآه آغا

محترم همت صاحب!
الله(ج) دى اجر عظيم په دارينو کى در کى

مختار

مننه همت صاحب.

عزت الله نېکمل

الله جل جلاله دې اجرونه درکړي قدرمن همت صيب، رب دې ټول مسلمانان له دې ناوړه ناروغۍ وساتي

غمی.پښتین

محترم همت صاحب اسلام علیکم. الله ج د روغ جوړ لره.ستاسو لیکلی دعاګانی په حفظ کولو لګیا یم.او دا دعاګانی به دوستانو ته هم د انترنیت د لاری ورولیږم. دا چه د د دی دعاګانی په حفظ لګیا یم،ځان له پرون څخه د کرونا مقابل کی غښتلی محسوسوم ،او انشالله صبا سهار به په ډاډه زړه خپلی وظیفه ته ځان ورسوم. حالات دومره ډارونکی دی .کله چه زه سهار د وظییفه په طرف روان شم .نو تقریبا ۳۳ کیلومتر لاره کی کله یو او کله دری موټر په مخه راشی، ښار .موټر وی.ټول داسی خالی دی لکه چه هډو په… نور لوستل »

Back to top button
4
0
Would love your thoughts, please comment.x
()
x
Close
Close