چین د کابل له نوي حکومت سره ګډ کار ته چمتووالی وښود
نن ټکی اسیا (سه شنبه، ۶ کب، ۱۳۹۸ل): د چین د بهرنیو چارو وزارت وایي، دوی د ټاکنو د کمېسیون له لوري د اشرف غني د بریا اعلان ته احترام لري او تیار دي له نوي حکومت سره ګډ کار وکړي.
دغه څرګندونې په کابل کې د چین سفیر د خپل هیواد بهرنیو چارو وزارت د ویاند له قوله لیکلي، په څرکندونو کې راغلي « موږ یاداښت کړه، چې د ټاکنو د خپلواک کمېسیون له لوري اشرف غني بریالی اعلان شو، چین د یوه ګاونډي هیواد په توګه د ټاکنو کمېسیون طرزالعمل او د افغانستان د خلګو خپلواکې پرېکړې ته احترام لري.»
وړاندې زیاته شوې «چین تیار دی، له افغانانو او نوي حکومت سره د افغانستان د سولې، امنیت او پرمختګ په برخه کې ګډ کار وکړي.»
Chinese Foreign Ministry Spokesperson：China noted that the Independent Election Commission announced President Ghani's victory. Afghanistan is our friendly neighbor. China respects the procedure of presidential election in Afghanistan, pic.twitter.com/Z7ETwfKIfY
— Wang Yu 王愚 (@ChinaEmbKabul) February 24, 2020
یاده دې وي، چې کابو یوه اوونۍ وړاندې د ټاکنو خپلواک کمېسیون د ګډ حکومت اوسنی مشر «اشرف غني» د ۵۰.۶۴ سلنه رایو په ګټلو سره بریالی اعلان کړ او عبدالله عبدالله یې د ۳۹ سلنه رایو په خپلولو سره دوهم مخکښ کاندید یاد کړ.
د ټاکنو کمېسیون دا پرېکړه د ټولو ټاکنیزو ډلو او نوماندانو له لوري رد شوه او له منځه یې د ثبات او همپالنې ټیم مشر «عبدالله عبدالله» د څو نورو ګوندونو په ملتیا د موازي حکومت اعلان وکړ.
عبدالله عبدالله د ځینو ولایتونو لپاره والیان هم وټاکل او د ټاکنو کمېسیون پر کمېشنرانو او کارکوونکو باندې یې له هیواده د وتلو بندیز ولګاوه.
په داسې حال کې، چې د دواړو لورو تر منځ ناندرۍ لا هم روانې دي، رویټرز خبري اژانس د خپلو سرچینو په حواله لیکي، امریکا له اشرف غني غوښتي، چې د لوړې مراسم وځنډوي.
